प्रेमास नकार दिल्याने अल्पवयीन मुलीचे अपहरण, दोघा आरोपींना तीन वर्षे सक्तमजुरीची शिक्षा

औरंगाबाद : प्रेमास नकार दिल्याने अल्पवयीन मुलीचे अपहरण करणाऱ्या दोघांना तीन वर्षे सक्तमजुरी आणि प्रत्येकी पाच हजार रुपयांचा दंडाची शिक्षा विशेष जिल्हा व सत्र न्यायाधीश एस. एस. भिष्मा यांनी ठोठावली आहे. सागर परदेशी (१९) आणि गणेश राठोड (१८, दोघे रा. बालानगर, पाचोड रोड, अंबड) अशी आरोपींची नावे आहेत. या प्रकरणात १६ वर्षीय पीडितेने दिलेल्या फिर्यादीनुसार ५ मे २०११ रोजी फिर्यादी मुलगी ही क्लासवरुन घराकडे परतत असताना बळीराम पाटील हॉस्टेलजवळ तिला तिचा मावस भाऊ भेटला, त्याने अल्पवयीन मुलगा तुला भेटण्यासाठी येणार असल्याचे सांगितले.

मात्र फिर्यादीने नकार दिल्याने मावस भाऊ तेथून निघून गेला. काही वेळाने अल्पवयीन मुलासह वरील दोघे आरोपी एका दुचाकीवर तेथे आले. प्रेम करण्यास नकार देते का म्हणत आरोपी सागरने तिला बळजबरी दुचाकीवर तिघांच्या मध्ये बसविले. त्यानंतर आरोपी फिर्यादीला घेऊन प्रथम कचनेरला (ता. औरंगाबाद) गेले व तेथून जालन्याकडे निघाले. जालन्याकडे जाताना एका दुचाकीवर चौघे असल्याने पोलिसांनी त्यांना हटकले व त्यांची गाडी थांबवली. पोलिसांनी चौकशी करताच फिर्यादीने घडलेली सर्व घटना सांगितली. त्यानंतर पोलिसांनी चौघांना जालना पोलिस ठाण्यात आणले. घटनेची माहिती सिडको पोलिसांना दिली. प्रकरणात सिडको पोलीस ठाण्यात गुन्हा दाखल झाला.

सहा साक्षीदारांचे नोंदविले जबाब
प्रकरणात तत्कालीन उपनिरीक्षक बी. यू. बोडखे यांनी तपास करुन न्यायालयात दोषारोपपत्र दाखल केले. सुनावणी वेळी अतिरिक्‍त जिल्हा सरकारी वकील सतीश मुंदवाडकर यांनी सहा साक्षीदारांचे जबाब नोंदवले. दोन्ही बाजूंच्या युक्तिवाद व साक्ष-पुराव्यांवरुन न्यायालयाने दोघा आरोपींना दोषी ठरवून तीन वर्षे सक्‍तमजूरी आणि प्रत्येकी पाच हजारांच्या दंडाची शिक्षा ठोठावली. प्रकरणात अ‍ॅड. मुंदवाडकर यांना अ‍ॅड. राधेशाम नरोटे यांनी सहाय केले.

संपादन - गणेश पिटेकर