किशनचंद तनवाणी यांची नाराजी दूर होणार का?

औरंगाबाद - भाजपअंतर्गत सुरू असलेल्या कलहामुळे गटतट समोर आले आहेत. शहराध्यक्ष, जिल्हाध्यक्ष निवडीनंतर पक्षातील नाराजांची भेट घेत त्यांची मनधरणी करण्याचे काम सध्या सुरू आहे. याअंतर्गत माजी शहराध्यक्ष किशनचंद तनवाणी यांची नवे शहराध्यक्ष संजय केणेकर यांनी बुधवारी (ता. 29) भेट घेतली. नाराज तनवाणी शिवसेनेच्या वाटेवर असल्यामुळे त्यांची मनधरणी करण्याचा प्रयत्न केला जात असल्याची माहिती सूत्रांनी दिली. 

हेही वाचा - याच्यावर आहे चाळीसपेक्षा अधिक गुन्हे औरंगाबादेतून चोरले होते सत्तर तोळे सोने 

जुने पदाधिकारी नाराज 
दोन दिवसांपूर्वी झालेल्या जिल्हाध्यक्ष व शहराध्यक्ष निवडीवरून पक्षात नाराजी आहे. राष्ट्रवादीतून आलेले विजय औताडे यांना पक्षात घेतल्यांनतर युवा मोर्चाचे जिल्हाध्यक्ष, उपमहापौर आणि त्यानंतर थेट जिल्हाध्यक्षपद दिल्यामुळे आमदार बागडे यांची नाराजी असल्याचे बोलले जात आहे. औताडे हे दानवे यांचे पाहुणे असल्यामुळे त्यांना ही संधी दिल्याची चर्चा पक्षातील निष्ठावंत कार्यकर्त्यांत सुरू आहे. यात संजय केणेकर यांच्या निवडीवर फारसा कुणाचा आक्षेप नसला तरी राष्ट्रवादीतून भाजपमध्ये आलेले विजय औताडे यांना जिल्हाध्यक्षपद दिल्यामुळे जुने पदाधिकारी नाराज झाले आहेत. युती तुटल्यामुळे भाजप स्वबळावर निवडणुका लढविणार असल्याची घोषणा आमदार अतुल सावे यांनी केली. स्वबळावर असल्यामुळे पक्षांतर्गत नाराजी, गटबाजी पक्षाला महागात पडू शकते. त्यामुळे जुन्या-नव्यांची सांगड घालत भाजप बळकट करा, असा आदेश वरिष्ठ नेत्यांनी नवनियुक्‍त पदाधिकाऱ्यांना दिला आहे. निवडणुकीच्या अनुषंगाने तनवाणी यांच्यावर महापालिकेची जबाबदारी टाकत दुसऱ्या पक्षात जाण्यापासून रोखणार का? की ते अन्य भूमिका घेणार, याकडे आता लक्ष लागून आहे. 

उघडून तर पाहा - या ठिकाणी अजूनही सुरक्षित आहे तान्हाजींची तलवार अन् माळ, पाहा PHOTOS

महापालिकेविषयी चर्चा 
आजच्या भेटीविषयी किशनचंद तनवाणी म्हणाले, की संजय केणेकरांची निवड झाल्यानंतर भेटीसाठी आले. आमच्यात महापालिकेच्या अनुषंगाने पक्षाची चर्चा झाली. तर शहराध्यक्ष संजय केणेकर म्हणाले, माझी निवड झाल्यावर सर्वांच्या भेटी घेत आहे. महापालिकेच्या निवडणुकीच्या अनुषंगाने ही भेट घेतली. सर्वांना सोबत घेऊन काम करणार आहे. महापालिका निवडणुकीत तनवाणी यांच्यासोबत काम करणार आहे.