Crime : पोलिसांना सलाम! छ. संभाजीनगर शहरात एकाच दिवसात 3 धार्मिक स्थळांची विटंबना पण...

छत्रपती संभाजीनगर : छत्रपती संभाजीनगर शहरात एकापाठोपात तीन ते चार ठिकाणी धार्मिक स्थळांची विटंबना झाल्याचा प्रकार उघड झाला. यानंतर पोलीस प्रशासनाने तत्परता दाखवत तातडीने यातील महिलेला ताब्यात घेतले. तर घटनेनंतर नागरिकांनीही संयम दाखवल्याने वाद मिटला आहे.

शहरात शनिवारी सकाळी साडेनऊ वाजता एका महिलेने स्कूटरवरून येताना एका धार्मिक फोटोची विटंबना केली. त्यानंतर काही वेळात उस्मानपुरा, पुंडलिकनगर, जवाहरनगर हद्दीत अशाच घटना घडल्या पण घटनेची माहिती मिळताच पोलीस आयुक्त मनोज लोहिया यांच्यासह वरिष्ठ अधिकारी घटनास्थळी दाखल झाले. सीसीटीव्हीच्या अधारे सदर महिलेला फक्त दोन तासांत ताब्यात घेण्यात आले.

धार्मिक स्थळांची विटंबना करणारी महिला ही पोस्ट विभागात टपाल सहायक म्हणून कार्यरत असून तिला कुशलनगर पोस्ट कार्यालयातून ताब्यात घेतले आहे. सदर महिला ही मानसिक आजाराने त्रस्त असल्याची माहिती पोलिसांना मिळाली आहे. याप्रकरणी पोलिसांनी सदर महिलेविरोधात गुन्हा दाखल केला आहे.

दरम्यान, घटना घडल्यानंतर समाजात कोणत्याही प्रकारचा तेढ निर्माण होऊ नये यासाठी पोलिसांनी तत्परता दाखवली होती. पोलिसांच्या तत्परतेमुळे समाजात कोणत्याही प्रकारचा तेढ निर्माण झाला नसून पोलिसांच्या कामगिरीचे कौतुक होत आहे.

त्यानंतर पोलीस आयुक्त लोहिया यांनी एक व्हिडिओ ट्वीटरवर शेअर करत "सदर महिला ही मानसिक आजाराने त्रस्त असून नागरिकांनी कोणत्याही अफवेवर विश्वास ठेवू नये. शहरातील शांतता व सुव्यवस्था अबाधित ठेवण्यासाठी सहकार्य करावे" असं अवाहन केले.