कोरोना, कोकड्याच्या धाकात मिरचीची तोडणी

वालसावंगी (जि.जालना) - एकीकडे कोरोनाचा धाक, दुसरीकडे कोकडा नावाच्या रोगाचा मिरचीवरील प्रादुर्भाव. या साऱ्या गोंधळात अनेकांची मिरची सध्या तोडणीला आली आहे. त्यामुळे सकाळपासूनच मिरची तोडणीची लगबग सुरू आहे. सोबत परस्परांना बोलण्यासाठी कोरोना, कोकडा हा विषयही आहे. 

जालना जिल्ह्यातील वालसावंगी परिसर मिरचीचे नंदनवन म्हणून परिचित आहे. यंदा मोठ्या प्रमाणावर शेतकऱ्यांनी मिरची लागवड केली आहे. त्यातच उन्हाळी लागवड असलेल्या झाडाला मिरच्या लगडल्या आहेत. परिणामी तोडणी सुरू झाली आहे.

हेही वाचा : पीककर्जावर शेतकऱ्यांची मदार

तोडणीसाठी मजुरांची मदत घेण्यात येत असल्याने अनेकांच्या हाताला काम मिळाले आहे. येणाऱ्या काही दिवसांत मिरची तोडणीला आणखी वेग येणार आहे. फक्त भाव समाधानकारक मिळावा, अशी अपेक्षा उत्पादक शेतकऱ्यांना आहे. 

हेही वाचा : जुईत पाऊस थुईथुई... 

मिरची लागवड केलेल्या अनेक शेतकऱ्यांच्या बहरलेल्या मिरची पिकांवर अचानकपणे कोकडा रोगाचा प्रादुर्भाव झाला आहे. यामुळे झाडाची पाने कोकडून गेली आहेत. अनेक महागडी औषध फवारणी करूनसुद्धा नियंत्रण होत नसल्याने शेतकरी त्रस्त झाले आहेत. काहींनी तर झाडे उपटून टाकली आहेत. यामुळे उत्पन्नावर मोठा परिणाम होणार आहे. 

लागवड केलेली मिरची बहरात होती; मात्र अचानकपणे कोकडा रोगाचा प्रादुर्भाव झाला. निम्म्याहून अधिक झाडे कोकडाग्रस्त झाली. यामुळे मोठे नुकसान झाले. आता ती झाडे उपटून टाकण्यात येऊन त्या जागेवर दुसरे पीक लावण्यात येणार आहे. 
- विजय बेराड, शेतकरी