माजलगाव (जि. बीड) - नगरपालिकेतील भ्रष्टाचारप्रकरणी न्यायालयीन कोठडीत असलेले नगराध्यक्ष सहाल चाऊस यांचा जामीन अर्ज शुक्रवारी (ता. तीन) जिल्हा सत्र न्यायालयाने पुन्हा एकदा फेटाळला. वैद्यकीय उपचार घेण्यासाठी तात्पुरता जामीन देण्याचीही चाऊस यांची मागणी न्यायालयाने फेटाळल्याने त्यांच्या अडचणीत मोठी वाढ झाली आहे.
माजलगाव नगरपालिकेतील १४ व्या वित्त आयोगासह विविध विकासकामांसाठी आलेल्या निधीतून पाच कोटी ५७ लाख रुपयांचा अपहार झाल्याप्रकरणी डिसेंबर २०१९ मध्ये आठ दिवसांत दोन गुन्हे दाखल करण्यात आले होते. यात तीन मुख्याधिकाऱ्यांसह अभियंता, लेखापाल अशा एकूण सात जणांवर विविध कलमांनुसार गुन्हे दाखल करण्यात आले होते.
चार मार्च रोजी नगराध्यक्ष सहाल चाऊस यांच्यासह मुख्याधिकारी हरिकल्याण येलगट्टे, लेखापाल अशोक कुलकर्णी यांना आर्थिक गुन्हे शाखेच्या अधिकाऱ्यांनी अटक करून न्यायालयासमोर हजर केले असता दोन दिवसांची पोलिस कोठडी सुनावली होती. त्यानंतर ११ मार्चपर्यंत न्यायालयाने अंतरिम जमीन दिला होता. पुन्हा न्यायालयाने हा जमीन रद्द करून सहाल चाऊस यांना १४ दिवसांची न्यायालयांनी कोठडी सुनावण्यात आली. न्यायालयीन कोठडीत असताना यापूर्वी दोनदा चाऊस यांच्यातर्फे दोन वेळा न्यायालयात जामीन अर्ज दाखल केला असता न्यायालयाने दोनदा तो फेटाळला.
हेही वाचा - परळीतील एक लाखावर वीटभट्टी कामगार आर्थिक संकटात
श्री. चाऊस यांना हृदयाचा आजार असून त्यांची बायपास शस्त्रक्रिया झालेली आहे. न्यायालयीन कोठडीत असताना त्यांना पुन्हा हृदयाचा त्रास होत असून पुढील उपचार औरंगाबाद येथे घ्यावा लागत असल्याने वैद्यकीय उपचार घेण्यासाठी तात्पुरता जामीन देण्याची मागणी दोन दिवसांपूर्वी न्यायालयाकडे केली होती. यावर शुक्रवारी (ता. तीन) सुनावणी घेऊन न्यायाधीश एस. पी. देशमुख यांनी चाऊस यांचा जामीन अर्ज तिसऱ्यांदा फेटाळला. सरकार पक्षातर्फे ॲड. रणजित वाघमारे यांनी काम पाहिले. सहाल चाऊस यांचा तिसऱ्यांदा जामीन अर्ज फेटाळल्याने त्यांच्या अडचणीत मोठी वाढ झाली आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.