जालना - येथील महिला व बाल रुग्णालयात एका आईने गोंडस बाळाला जन्म दिला. रुग्णालयातील कर्मचाऱ्यांनी नातेवाइकांना मुलगा झाल्याचे सांगितले खरे; मात्र प्रसूतीनंतर बाहेर आल्यानंतर आईसोबत मुलगी असल्याचे निदर्शनास आले अन् एकच गोंधळ उडाला. दरम्यान, परिचारिकेकडून बाळाची नोंद करताना चूक झाल्याचे सांगितले जात असले, तरी बाळाची अदलाबदल झाल्याची शंका उपस्थित केल्यामुळे आई व बाळाची डीएनए चाचणी करण्याचा निर्णय घेण्यात आला आहे.
जाफराबाद येथील तरनूम शेख (वय 19) यांना रविवारी सायंकाळी साडेसहाला महिला व बाल रुग्णालयात दाखल केले. काही मिनिटांतच त्यांनी बाळाला जन्म दिला. प्रसूतीनंतर बाळाची रजिस्टवर नोंद करताना मुलगीऐवजी मुलगा अशी नोंद करीत नातेवाइकांनाही मुलगा झाल्याचे परिचारिकेने सांगितले; मात्र अर्ध्या तासानंतर आईकडे सोपविलेले बाळ मुलगी असल्याचे लक्षात आले. त्यामुळे रुग्णालयात मोठा गोंधळ उडाला.
रुग्णालयाचे अधीक्षक डॉ. राजेंद्र पाटील व जिल्हा शल्यचिकित्सक डॉ. मधुकर राठोड यांनी प्रकरणाची चौकशी केली असता परिचारिकेकडून चुकीची नोंद झाल्याने हा प्रकार घडल्याचे सांगण्यात आले. पोलिस तक्रारीनंतर नातेवाइकांनी बाळासह आईची डीएनए चाचणी करण्याची मागणी केली आहे. त्यानुसार मंगळवारी (ता. 19) डीएनए चाचणीसाठी बाळ व आईच्या रक्ताचे नमुने पुण्याला पाठविण्यात आले आहेत.
|