कोरोनाबाधित महिलेचा दुसरा अहवाल पॉझिटिव्ह

जालना -  जिल्ह्यात पहिला कोरोनाबाधित रुग्ण आढळून आलेल्या ६५ वर्षीय महिलेचा दुसऱ्यांदा पाठवण्यात आलेल्या नमुन्याचा अहवाल बुधवारी (ता.१५) रात्री पॉझिटिव्ह आला आहे. 

शहरातील दुखीनगर भागातील एका महिलेचा ता.सहा एप्रिल रोजी कोरोना अहवाल पॉझिटिव्ह आला होता. तिच्यावर जिल्हा सामान्य रुग्णालयात उपचार सुरू आहेत. सात दिवसांनंतर तिचे पुन्हा नमुने घेऊन प्रयोगशाळेत पाठविण्यात आले होते. त्या नमुन्याचा अहवालही पॉझिटिव्ह आला असल्याची माहिती जिल्हा शल्यचिकित्सक डॉ.मधुकर राठोड यांनी दिली आहे.

हेही वाचा : जालन्याच्या इतिहासात प्रथमच स्टील उद्योग बंद

रुग्णालयात दाखल झाल्यापासून तिच्या प्रकृतीत सुधारणा होत नव्हती. सध्याही तिची प्रकृती स्थिर असल्याचे डॉ.राठोड यांनी सांगितले आहे. रुग्णाचे सात, दहा आणि चौदा दिवसांनंतर नमुने तपासून पाहिले जातात. 

जिल्ह्यातील ७८ संशयितांचे स्वॅब पडताळणीसाठी 

जालना जिल्ह्यात कोरोनाच्या एकुण ५५८ व्यक्ती संशयित असुन सध्या रुग्णालयात ८६ व्यक्ती भरती आहेत. खबरदारीचा उपाय म्हणून यापूर्वी निगेटीव्ह आलेल्या ७८ संशयितांचे नमुने पुन्हा पडताळणीसाठी पाठविण्यात आल्याची माहिती आरोग्य विभागातर्फे देण्यात आली आहे. 

हेही वाचा : पोलिसांच्या सुदृढ आरोग्यासाठी अष्टसूत्री

कोरोना संशयित म्हणून आतापर्यंत एकुण ४४५ व्यक्तींची तपासणी करण्यात आली. त्यापैकी एकाच अहवाल ता.६ एप्रिल रोजी पॉझिटीव्ह आला. तर ४२९ जणांचे अहवाल निगेटीव्ह आले आहे. कोरोना बाधीत रुग्णावर जिल्हा सामान्य रुग्णालयात उपचार सुरू आहेत. सध्या दाखल असलेल्या ११ रुग्णांचा अहवाल प्रलंबित आहेत. गुरुवारी अलगीकरण कक्षातुन १७ जणांना घरी पाठविण्यात आले आहे.