डोळ्यात तेल घालून पहारा देऊनही उदगीरात कोरोनाने खाते उघडले

उदगीर : शहरांमध्ये टाळेबंदी असताना डोळ्यामध्ये तेल घालून प्रशासनाने पहारा देऊनही कोरोनाने खाते उघडले आहे. गुजरातहुन आलेल्या एका महिलेचा अहवाल पॉझिटिव्ह आल्याची माहीती जिल्हा शल्य चिकित्सक डॉ. संजय ढगे यानी दिली आहे. यामुळे शहर व परिसरात खळबळ उडाली आहे.

लातूर जिल्हा कोरोनामुक्त झाला असतानाही बाहेरून येणाऱ्यांची संख्या दररोज सुरूच असल्याने हीच बाब उदगीरसाठी गंभीर ठरली आहे. एक सत्तर वर्षीय महिला उदगीर शहरातील चौबारा रोड परिसरात दाखल झाली होती. ती बाहेरून आली असे कळल्यानंतर प्रशासनाने तिला गुरुवारी (ता.23) दवाखान्यात नेऊन तपासणी केली व तीचा स्वॅब तपासणीसाठी पाठवला होता. त्याचा अहवाल शनिवारी (ता.25) प्राप्त झाला असून अहवाल पॉझिटिव्ह आल्याचे डॉ. ढगे यांनी सांगितले.

HIVप्रमाणे कोरोनाचाही होतो का आरोग्यावर दूरगामी परिणाम - वाचा

संबंधित महिलेवर दोन दिवसापासून येथील कोरोना सामान्य रुग्णालयात उपचार सुरू आहेत. ही महिला नेमके गुजरातीतून कशी आली. या महिलेच्या संपर्कात कोणकोण आले. याबाबत माहिती घेतली जात असून नेमका कोणता विभाग सील करायचे किंवा काय काय उपाययोजना करायच्या याबाबत प्रशासनाचे नियोजन सुरू आहे.

उपजिल्हाधिकारी प्रवीण मेंगशेट्टी यांनी तातडीने नगरपालिका पोलिस प्रशासन आरोग्य विभाग व महसूल विभागातील प्रमुख अधिकारी यांची बैठक बोलावली असुन हा संसर्ग जास्त प्रमाणामध्ये पसरू नये यासाठी प्रशासन काळजी घेत आहे.

क्रिकेटपूर्वी सचिनने केलेय या चित्रपटात काम

भुकंपासारखे उदगीर हादरले...

एका महिलेचा अहवाल पॉझिटिव्ह आल्याच्या बातमीने प्रशासनासह उदगीर शहर भूकंपासारखे हादरले. सगळीकडे धावपळ सुरू झाली असून ही अफवा  आहे की सत्यता यासाठी नागरिकांनी प्रशासनाकडे फोनचा अक्षरशा पाऊस पडला होता. एवढे दिवस डोळ्यात तेल घालून पहारा देऊन एक रुग्ण पॉझिटिव्ह आल्याने सर्वांना आश्‍चर्याचा धक्का बसला.