जिल्हाधिकाऱ्यांच्या ‘या’ निर्णयामुळे हिंगोलीकरांना काहीसा दिलासा...

हिंगोली ः जिल्‍ह्यात बुधवारपासून (ता.१५) एक दिवसाआड किराणा, भाजीपाला तसेच कृषी केंद्र सुरू राहणार आहेत. यापुर्वी पाच दिवसाआड शहरात हे सर्व व्यवहार सुरू होते. आता ते एक दिवसाआड सुरू राहणार असल्याचे आदेश जिल्‍हाधिकारी रुचेश जयवंशी यांनी दिले आहेत.

जिल्‍ह्यात संचारबंदी, लॉकडाऊन सुरू असल्याने तसेच एक पॉझीटिव्ह रुग्ण आढळल्याने यापुर्वी एक दिवसाआड मिळणारा भाजीपाला पाच दिवसाआड करण्यात आला होता. त्‍याबरोबरच किराणा दुकाने देखील पाच दिवसाआड सुरू होती. यात केवळ औषधी दुकाने दररोज सकाळी नऊ ते एक यावेळात सुरू होती. आता मात्र हा निर्णय बदलून एक दिवसाआड किराणा व भाजीपाला सकाळी नऊ ते एक या वेळात सुरू राहणार आहेत.

परवानाधारक कृषी केंद्र राहणार सुरू
खरीप हंगाम जवळ येत आहे व व्यापाऱ्यांना खते व बियाणे साठा करणे तसेच शेतीसाठी उपयोगी महत्‍वाचे साहित्य जसे की ड्रीप, स्‍प्रिंकलर, पाईप पुरवठा सुरळीत असणे आवश्यक आहे. ही सर्व दुकाने व जिल्‍ह्यातील परवानाधारक कृषी केंद्र आवश्यक असल्याने त्यासाठी एक दिवसाआड ही दुकाने सुरू राहणार आहेत. त्‍याचे वेळापत्रक पुढीलप्रमाणे आहे. बुधवार (ता.१५), शुक्रवार (ता.१७), रविवार (ता.१९), मंगळवार (ता.२१) गुरूवार (ता.२३), शनिवार (ता.२५), सोमवार (ता.२७), बुधवार (ता.२९) या दिवशी सकाळी नऊ ते एक या वेळात सुरू राहणार आहेत.

हेही वाचा -  रोग प्रतिकारशक्ती वाढण्यासाठी हिंगोलीकर रमले योगसाधनेत...

सण, उत्‍सव, आंदोलने पुढील आदेशापर्यंत बंद
तसेच सुरक्षिततेचा उपाय म्‍हणून चित्रपटगृह, तरणतलाव, व्यायामशाळा, नाट्यगृह, मंगलकार्यालय हे पुढील आदेश येईपर्यत बंदच राहणार आहेत. तसेच संचारबंदी गुरूवारपर्यंत (ता.30) एप्रिलपर्यत कायम राहणार आहे. जिल्‍ह्यातील कोणत्याही नागरिकास अत्यावश्यक कारण वगळता बाहेर जिल्‍ह्यात जाण्यास मनाई आहे. तसेच बाहेरच्या कुणालाही येण्यास मनाई करण्यात आली आहे. पुणे, मुंबई, येथून आलेल्यांना वैद्यकीय कारणाशिवाय घराबाहेर पडता येणार नाही. संचारबंदीत यापुर्वी प्रमाणेच सण, उत्‍सव, आंदोलने धार्मिक कार्यक्रम, आदींचे आयोजन करता येणार नाही.

हेही वाचा - लॉकडाऊन : रोजगाराविना थांबला चुलीचा धूर

मॉल, शाळा, उद्याने, महाविद्यालय, क्रीडांगणे बंदच राहणार
तसेच अत्यावश्यक सेवा वगळता इतर सर्वाना संचारबंदीचे सर्व नियम लागून राहणार आहेत. जिल्‍ह्यातील खाजगी व सार्वजनिक ठिकाणी पाचपेक्षा अधिक व्यक्‍तींना एकत्रित येत असतील अशा सर्व दुकानसेवा, अस्‍थापना, उपहारगृह, खानावळ, मॉल, शाळा, उद्याने, महाविद्यालय, क्रीडांगण, शिकवणी वर्ग प्रार्थनास्‍थळे (ता.३०) एप्रिलपर्यत बंदच राहणार आहेत.