परळीमध्ये कुलर उत्पादन कारखान्याला आग; लाखोंचं नुकसान

परळी वैजनाथ (जि.बीड) : शहरातील औद्योगिक वसाहतीमध्ये असलेल्या साई कुलर या कारखान्यास बुधवारी (ता.२३) सायंकाळी अचानक आग लागली. त्यामध्ये लाखो रुपयांचे सामान व कुलर जळून खाक झाल्याची घटना घडली आहे. आग आटोक्यात आणण्यासाठी ६ अग्नीशमन दलाचे जवान, कर्मचारी दोन तासांहून अधिक वेळापासून प्रयत्न करत होते. रात्री ७.३० पर्यंत आग आटोक्यात आली नव्हती.

शहरातील औद्योगिक वसाहतीत सोळंके बंधू यांचे साई कुलर उत्पादन करणारा कारखाना आहे. या कारखान्यास बुधवारी सायंकाळी ५.४० च्या सुमारास अचानक आग लागली. आगीचे लोट व धुरामुळे कारखान्यातील कामगारांना आग विझवता आली नाही. पाहता-पाहता आगीने रौद्र रूप धारण केले.

जालना जिल्ह्यात नाफेडचे खरेदी केंद्र बंद होण्यास सुरवात, खुल्या मार्केटमध्ये अधिक भाव

या कारखान्यात प्लास्टिक,लोखंडी कुलर बनवले जातात. सध्या हिवाळ्याचे दिवस असल्याने या काळात कुलर तयार करुन ते उन्हाळी हंगामात विकले जातात. दरम्यान आगीमुळे कारखान्यातील लाखों रुपयांचा कच्चा व इतर माल जळून खाक झाला आहे. आग विझवण्यासाठी नगर पालिकेच्या अग्नीशमन दलाच्या तीन गाड्या, औष्णिक विद्युत केंद्राची, वैद्यनाथ सहकारी साखर कारखाना, आंबेजोगाई नगरपरिषद, सोनपेठ नगरपालिकेच्या एक-एक अग्निशामक दलाच्या गाड्या घटनास्थळी आग आटोक्यात आणण्यासाठी प्रयत्न करत असून ही आग आटोक्यात आल्यानंतरच आग कशामुळे लागली याचे कारण समजणार असल्याची माहिती सुत्रांकडून मिळाली आहे.

विधानसभेत काही आमदार पैसे उकळण्यासाठी विचारतात प्रश्‍न, इम्तियाज जलील यांचा आरोप

बघ्यांची गर्दी- 
येथील औद्योगिक वसाहतीमध्ये लागलेली आग पाहण्यासाठी बघ्यांची मोठी गर्दी झाली होती. गर्दी आटोक्यात आणण्यासाठी दंगर नियंत्रण पथकास पाचारण करावे लागले. तसेच आग लागल्यानंतर नगरपालिकेचे अगनीशमन दल जवळपास पाऊण तासांनी घटनास्थळी दाखल झाले. या अगनीशमन दलामध्ये कर्मचारी कमी असल्याने युवकांनी मोठी मदत केली. यावेळी तहसीलदार श्री.शेजूळ, नगरपालिकेचे गटनेते वाल्मिक कराड, नगरसेवक चंदूलाल बियाणी, चेतन सौंदळे, जयपाल लाहोटी यांनी घटनास्थळी भेट दिली.