परतीच्या पावसाने ५५ लाखांचे नुकसान

हिंगोली - दसरा सणाला झेंडूच्या फुलांना चांगला भाव मिळाला नसला तर दिवाळी मात्र चांगली होईल या अपेक्षेने झेंडूची बाग जपणाऱ्या पार्डी पोहकर (ता.सेनगाव) येथील फुल उत्पादक शेतकऱ्यांच्या आशेवर परतीच्या पावसाने पाणी फेरले. या भागात तब्बल ५५ लाख रुपयांचे नुकसान झाले आहे. 

सेनगाव तालुक्यातील पार्डी पोहकर हे झेंडू फुलांचे उत्पादकांचे गाव म्हणून ओळखले जाते. याठिकाणी सुमारे दोनशे एकर पेक्षा जास्त क्षेत्रावर झेंडूचे उत्पादन घेतले जाते. पुणे, नाशीक, हैदराबाद, बेंगलोर या भागातील व्यापारी शेतात येऊन झेंडूची फुले खरेदी करतात. दरवर्षी दिवाळी व दसरा सणामधे सुमारे साठ ते ७० लाख रुपयांची उलाढाल होते. 

यावर्षीही या भागातील शेतकऱ्यांनी झेंडूची फुले घेतली होती. मात्र दसरा सणाच्या वेळी तीन ते चार रुपयेच भाव मिळाल्यामुळे लागवडीचा खर्चही निघाला नाही.  त्यानंतर दिवाळीला फुल खरेदीसाठी बाहेरच्या व्यापाऱ्यांनीही होकार दर्शवला होता. त्यानुसार दिवाळीला चांगला दर मिळून नेहमी प्रमाणे पैसे मिळतील अशी अपेक्षा शेतकऱ्यांना  होती. मात्र परतीच्या पावसामुळे या फुल उत्पादक शेतकऱ्यांच्या आशेवर पाणी फेरले गेले. परतीच्या पावसामुळे फुले झाडावरच सडून गेली तर झाडे देखील सडल्याने बाहेर राज्यातील व्यापारी फुलांच्या खरेदीसाठी आलेच नाही. त्यामुळे शेतकऱ्यांचे तब्बल ५५ लाख रुपयांचे नुकसान झाले आहे. शासनाने फुल उत्पादक शेतकऱ्यांना नुकसान भरपाई द्यावी अशी मागणी केली जात आहे. 

नुकसान कसे सहन करावे - सुभाष पोहकर, शेतकरी 
दरवर्षी  संपूर्ण गावातून फुलांचे उत्पादन घेतले जाते. कमीत कमी ५५ लाख रुपयांची उलाढाल होते. मात्र यावर्षी परतीच्या पावसाने शेतकऱ्यांच्या आशेवर पाणी फेरले आहे. त्यामुळे दिवाळीचा सणही साजरा करता आला नाही. शासनाने या भागात नुकसानीचे पंचनामे करून भरपाई द्यावी.