दरोड्याच्या तयारीतील चौघांच्या मुसक्‍या आवळल्या 

जालना -  शहरात कदीम जालना पोलिस ठाण्याच्या हद्दीत दरोड्याच्या तयारी असलेल्या चार संशयितांना पोलिसांनी शुक्रवारी (ता. तीन) अटक केली आहे. तर तीन संशयित अंधाराचा फायदा घेत पसार झाले आहेत. त्यांच्याकडून एक चोरीच्या गाडीसह दरोड्याचे साहित्य जप्त करण्यात आले आहे. दरम्यान, या संशयितांनी उस्मानाबाद जिल्ह्यातील नळदुर्ग येथे बॅक ऑफ महाराष्ट्र फोडण्याचा प्रयत्न केला व नेवासा येथे दरोडे टाकल्याचे पोलिसांकडून सांगण्यात आले आहे. 

हेही वाचा : क्राईम सिरियल पाहून जुन्या प्रियकराने काढला काटा 

शहरातील मस्तगड परिसरातील एका शेतात सहा ते सात व्यक्‍ती घातक शस्त्रासह असल्याचे गस्तीवर असलेल्या पोलिसांना दिसून आले. मात्र, पोलिसांना पाहिल्यानंतर संशयितांनी पळ काढला. दरम्यान, पोलिसांनी त्यांचा पाठलाग करून चार संशयितांना पोलिसांनी ताब्यात घेतले; मात्र तीन संशयित पोलिसांना गुंगारा देत फरारी झाले. यात संशयित किशोरसिंग ऊर्फ टकल्या रामसिंग टाक (वय 22, रा. गुरुगोविंदसिंगनगर, जालना), दियासिंग बरीहमसिंग कलानी (23, रा. हिंदनगर, नवीन मोंढा, जालना), गजानन सोपान शिंगाडे (30, रा. पाचनवडगाव, ता.जि. जालना) आणि अनिल गोरखनाथ वलेकर (25, रा. काजळा, ता. बदनापूर, जि. जालना) या चौघांना अटक करण्यात आली आहे. तर तेजासिंग नरसिंग बावरी, हरदीपसिंग बबलूसिंग टाक (दोघे रा. गुरुगोविंदसिंगनगर, जालना) व मनोहरसिंग ऊर्फ भुत्य प्रेमसिंग टाक (रा. जमुनानगर, जालना) हे तीन संशयित फरारी झाले आहेत.

हेही वाचा : वयोवृद्ध जन्मदात्यांवर लेकाचे कुऱ्हाडीने वार 

दरम्यान, या संशयितांकडून जप्त केलेली जीप ही किनगावराजा (जि. बुलडाणा) पोलिस ठाण्याच्या हद्दीतून ता. 27 डिसेंबर रोजी चोरलेली आहे; तसेच या संशयितांनी उस्मानाबाद जिल्ह्यातील नळदुर्ग पोलिस ठाण्याच्या हद्दीत ता. दोन जानेवारी रोजी बॅंक ऑफ महाराष्ट्र बॅंकेवर दरोडा टाकण्याचा प्रयत्न केला. तर नेवासा येथील एक सराफा दुकानही फोडल्याचे पोलिसांकडून सांगण्यात आले आहे. दरम्यान, या टोळीकडून अजून बरेच गुन्हे उघड होण्याची शक्‍यता आहे. ही कारवाई एडीएसचे पोलिस निरीक्षक यशवंत जाधव, कदीम जालना पोलिस ठाण्याचे पोलिस निरीक्षक देविदास शेळके यांच्यासह त्यांच्या पथकातील कर्मचाऱ्यांनी केली.