Hingoli : रस्त्याच्या दुरुस्तीसाठी ‘राष्ट्रवादी’चे रास्ता रोको

सेनगाव : फाळेगाव ते जिंतूर या राज्य रस्त्यावरील लिंबाळा ते येलदरी या रस्त्याची अत्यंत दुरवस्था झाली आहे. वेळीच रस्ता दुरुस्त करण्यात यावा, या मागणीसाठी राष्ट्रवादी काँग्रेसच्या वतीने बुधवारी (ता. १४) सकाळी रास्ता रोको आंदोलन करण्यात आले.

लिंबाळा ते येलदरी रस्त्याची चाळणी झाली असून, रस्त्यावर मोठमोठे- खड्डे पडले आहेत. पावसाच्या पाण्यामुळे खड्डे पाण्यानी भरले असून, वाहनधारकांना खड्ड्यांचा अंदाज येत नसल्यामुळे अपघाताची भीती व्यक्त केली जात आहे. प्रशासनाने वेळीच रस्त्याची दुरुस्ती करावी, अशी मागणी आंदोलकांनी केली.

यावेळी तालुकाध्यक्ष रवी गडदे, माजी नगरसेवक उमेश देशमुख, सरपंच उत्तम ठोके, जगन माकोडे, बाबाराव माकोडे, विनायक हराळ, शेषराव जाधव, गजानन गडदे, गजानन वाघमोडे, झनक ठोके यांची उपस्थिती होती. आंदोलनामुळे एक तास वाहतूक ठप्प झाली होती.

यावेळी पोलिस प्रशासन व सार्वजनिक बांधकाम विभागाच्या अधिकाऱ्यांनी आंदोलन कर्त्यांची भेट घेतली. आंदोलकांकडून संबंधित अधिकाऱ्यांना निवेदन देण्यात आले. लवकरात- लवकर रस्त्याचे काम सुरू करण्याचे आश्वासन प्रशासनाकडून देण्यात आले. त्या नंतर आंदोलन मागे घेण्यात आले.