Video : पेट्रोलपंप जनमानसांत विश्वासपात्र ठरेल : लोहिया

परभणी : जिल्हा पोलिस दलातील अधिकारी-कर्मचाऱ्यांच्या कुटुंबीयांना पोलिस कल्याण निधीच्या माध्यमातून जास्तीत जास्त आर्थिक संरक्षण देण्यासाठी या पेट्रोलपंपाची उभारणी करण्यात आली आहे. हा पेट्रोलपंप जनमानसांत विश्वासपात्र ठरेल व जिल्ह्यात नावाजलेला पेट्रोलपंप म्हणून पोलिस पेट्रोलपंपाची ओळख निर्माण होईल, असा आशावाद नांदेड परिक्षेत्राचे विशेष पोलिस महानिरीक्षक मनोज लोहिया यांनी मंगळवारी (ता. १४) व्यक्त केला.

हेही वाचा - मिकीमाऊस, छोटा भीम, पोकी मॅन करतात स्वच्छतेचा जागर !

परभणी जिल्हा पोलिस कल्याण निधीअंतर्गत जिल्हा पोलिस पेट्रोलपंपाचे उद्‍घाटन मंगळवारी नांदेड परिक्षेत्राचे पोलिस महानिरीक्षक मनोज लोहिया यांच्या हस्ते झाले. उद्‍घाटन कार्यक्रमास पोलिस अधीक्षक कृष्णकांत उपाध्याय, अप्पर पोलिस अधीक्षक आर. रागसुधा, इंडियन ऑईल कॉर्पोरेशनचे महाप्रबंधक अजय श्रीवास्तव, उपमहाप्रबंधक सुहास तुमाने, सहायक पोलिस अधीक्षक नितीन बगाटे, सहायक पोलिस अधीक्षक श्रवण दत्त, पोलिस उपाधीक्षक सुनील ओव्हळ यांच्यासह पोलिस दलातील सर्व वरिष्ठ अधिकारी उपस्थित होते.

पुढे बोलताना श्री. लोहिया म्हणाले, ‘‘पोलिस अधिकारी - कर्मचाऱ्यांच्या कुटुंबीयांची जबाबदारीसाठी पोलिस कल्याण निधी आहे. परंतु, आलीकडच्या काळात हा निधी कमी प्रमाणात जमा होत होता. खडतर सेवा देतांना पोलिसांच्या कुटुंबीयांवर आलेल्या संकटाकाळी पोलिस दल कुटुंबीयांच्या पाठीमागे उभे असते. त्यासाठी पोलिस कल्याण निधीचा वापर केला जातो. या निधीतून पोलिसांसाठी व्यायाम शाळा, अभ्यासिका, दवाखान्याची निर्मिती या निधीतून केली जाते. त्यासाठी निधी उभारणे महत्त्वाचे आहे. यासाठी हा पेट्रोलपंप उभारण्यात आला आहे. जनमानसांत हा पेट्रोलपंप विश्वास निर्माण करेल याची खात्री असून याद्वारे पोलिस व सर्वसामान्य नागरिकांत सुसंवादही घडेल. अतिशय कमी वेळेत या पेट्रोलपंपाची मान्यता व उभारणी करण्यात आली आहे. त्यासाठी पोलिस अधीक्षक कृष्णकांत उपाध्याय यांचे कौतुक.’’ कार्यक्रमाचे सूत्रसंचालन पोलिस निरीक्षक प्रवीण मोरे यांनी केले. आभार सहायक पोलिस अधीक्षक नितीन बगाटे यांनी मानले.

हेही वाचा व पहा - अबब...! परभणीत विदेशी बनावटीच्या सिगारेट जप्त

परभणीकरांसाठी पोलिसांकडून भेट
पोलिसांनी उभारलेला पेट्रोलपंप हा परभणी शहरातील नागरिकांसाठी मोठी भेट आहे. त्यासाठी इंडियन ऑईल कॉर्पोरेशनच्या वतीने पुरेपूर मदत करण्यात येत आहे. जिल्ह्यातील क्रमांक एकचा पेट्रोपपंप होईल, अशी आशा आहे. यातून पोलिस दलाला बिझनेस तर होईलच; परंतु यातून ग्राहकांचे समाधानदेखील केले जाईल, असे इंडियन ऑईल कॉर्पोरेशनचे महाप्रबंधक अजय श्रीवास्तव यांनी सांगितले.

कल्याण निधीची उभारणी होणार
मी परभणी जिल्हा पोलिस अधीक्षकपदी रुजू झाल्यानंतर माझ्यासमोर दोन पेच उभे राहिले. त्यातील सर्वांत मोठा पेच हा पोलिस कल्याण निधीचा होता. त्यामुळेच मी पेट्रोलपंपाच्या उभारणीसाठी सातत्याने प्रामाणिक प्रयत्न केले. हा पेट्रोलपंप परभणीकरांसाठी कल्याणकारी ठरणार आहे, असा विश्वास पोलिस अधीक्षक कृष्णकांत उपाध्याय यांनी व्यक्त केला.
 

हेही वाचा -  ‘या’ शहरात हॉकर्स झोन समिती कागदावरच !