नाफेडच्या हरभरा खरेदीची मर्यादा प्रत्येकी २५ क्विंटलचीच 

जालना, ता.१८ : यंदा हरभरा पिकाची उत्पादकता वाढलेली आहे. असे असतानाही प्रत्येकी कमाल २५ क्विंटल हरभरा खरेदीची अट नाफेडने कायम ठेवली आहे. त्यामुळे कोरोनाच्या पार्श्‍वभूमीवर शेतकऱ्यांत थोडा दिलासा, थोडी निराशा अशी भावना आहे. 

शासनाने हरभऱ्याला चार हजार ८७५ रुपये प्रति क्विंटल हमीभाव जाहीर केला आहे. सुरवातीला हरभऱ्याची उत्पादकता हेक्टरी ६.८७ क्विंटल प्रति हेक्टरी ठरविण्यात आली होती. मात्र, ही उत्पादकता खूपच कमी असल्याने फेर उत्पादकता काढण्यात आली. आता हरभऱ्याची उत्पादकता हेक्टरी १०.५८ क्विंटल ठरविण्यात आली आहे. त्यामुळे आता नाफेडकडून हेक्टरी १०.५८ क्विंटल हरभरा खरेदी केला जाणार आहे. 

हेही वाचा : जालन्याच्या इतिहासात प्रथमच स्टील उद्योग बंद

फेडकडून जिल्ह्यात तुरीपाठोपाठ हरभरा खरेदी सुरू केली आहे. नाफेडच्या सहा खरेदी केंद्रापैकी भोकरदन आणि जालना येथील खरेदी केंद्रावर हरभरा खरेदी सुरू झाली आहे. नाफेडकडून मार्च महिन्याच्या सुरवातीला जिल्ह्यातील हरभरा उत्पादकता ही ६.८७ क्विंटल प्रति हेक्टर असल्याचे कळविण्यात आले होते. मात्र, प्रत्यक्षात ही उत्पादकता कमी असल्याने शेतकरी वर्गातून नाराजीचा सुरू निघाला होता.

हेही वाचा : नवऱ्याला भांडून गेली, कोरोनाला सापडली

त्यामुळे कृषी विभागाने हेक्टरी हरभरा उत्पादकतेचे पुनर्मुल्यांकन करून सुधारित उत्पादकता कळविली. त्यानुसार नाफेडने खरेदीसाठी हरभऱ्याची उत्पादकता वाढविली असून आता हेक्टरी १०.५८ क्विंटल हरभरा नाफेड खरेदी करणार आहे.मात्र, दुसरीकडे नाफेडने हरभरा खरेदीची मर्यादा वाढविली नाही. परिणामी एका शेतकऱ्याकडून केवळ २५ क्विंटलपर्यंतच नाफेड हरभरा खरेदी करणार आहे. त्यामुळे आता नाफेडने ज्या प्रमाणात हरभऱ्याची उत्पादकता वाढली त्याच प्रमाणात हरभरा खरेदीची मर्यादा वाढविली तर या कोरोनाच्या सावटामध्ये शेतकऱ्यांच्या हाती चार पैसे अधिकचे मिळण्याची सोय होईल. 

शासनाकडून हरभऱ्याची सुधारित उत्पादकता प्राप्त झाली आहे. त्यानुसार हरभराची उत्पादकता पूर्वीपेक्षा वाढविण्यात आली असून आता हेक्टरी १०.५८ क्विंटल हरभरा खरेदी करण्यात येणार आहे. एका शेतकऱ्याकडून २५ क्विंटलपर्यंत हरभरा खरेदीची कमाल मर्यादा आहे. 
-विमल वाघमारे, जिल्हा मार्केटिंग अधिकारी, जालना.