उस्मानाबाद : जिल्हा बँकेसाठीही महाविकास आघाडी?

उस्मानाबाद : जिल्हा मध्यवर्ती सहकारी बँकेच्या निवडणुकीसाठी महाविकास आघाडी विरुद्ध भाजप असा सामना रंगण्याची चिन्हे दिसत आहेत. महाविकास आघाडीच्या प्रमुख नेत्यांमध्ये चर्चा लेली असून, लवकरच सर्वांची एकत्रित बैठक होणार असल्याचे सूत्रांनी सांगितले. भाजपच्या उमेदवारांनी अर्ज भरण्यास सुरुवात केल्याचे दिसून येत आहे. भाजपकडून एका गटाशी चर्चा सुरू असल्याचे सांगितले जात असले तरी त्यावर उघडपणे सध्यातरी कोण बोलताना दिसत नाही. त्यामुळे सद्यःस्थितीत भाजप ‘एकला चलो रे’च्या भूमिकेत दिसत आहे.

जिल्हा बँकेच्या निवडणुकीसाठी आतापर्यंत २५ उमेदवारी अर्ज दाखल करण्यात आले आहेत. ३२५ अर्जांची विक्री झाली. पक्षीय पातळीवर आघाडी किंवा स्वबळ याचा निर्णय झालेला दिसत नाही. महाविकास आघाडीच्या घटक पक्षांमध्ये आता बैठक होणार असल्याची माहिती सूत्रांनी दिली. प्रमुख नेत्यांमध्ये चर्चादेखील झाल्याची माहिती आहे. २४ जानेवारीपर्यंत उमेदवारी अर्ज भरण्याची अंतिम मुदत असल्याने उर्वरित तीन दिवस काय घडामोडी घडणार याकडे जिल्ह्याचे लक्ष लागले आहे. जिल्हा बँकेमध्ये पंधरा संचालकांसाठी ही निवडणूक होत आहे. त्यासाठी ८०५ मतदार आहेत.

दरवर्षी पक्षीय पातळीवर शिवसेना-काँग्रेस हे आघाडी करत होते. राज्यस्तरावर महाविकास आघाडीचे सरकार आल्यापासून भाजप विरोधात महाविकास आघाडी असे चित्र अनेक ठिकाणी पाहायला मिळत आहे. जिल्ह्याचा विचार केला तर राष्ट्रवादी काँग्रेसमध्ये असलेले आमदार राणाजगजितसिंह पाटील हे आता भाजपत गेल्याने त्यांच्या विरोधकांनी पुन्हा मोट बांधण्यास सुरुवात केली आहे. शिवसेनेसाठी आमदार प्रा. तानाजी सावंत यांची भूमिका महत्त्वाची असणार आहेत. महाविकास आघाडीऐवजी प्रा. सावंत जिल्हा परिषदेसारखी वेगळी चूल मांडणार का, याकडे भाजपाच्या नजरा असल्याचे दिसून येत आहे.