Maratha Reservation : कवठ्यात सरकारची प्रतिकात्मक अंत्ययात्रा; अंत्ययात्रेत महिलांचा लक्षणिक सहभाग

उमरगा - मराठा समाजाला आरक्षण मिळावे यासाठी व मनोज जरांगे-पाटील यांच्या अमरण उपोषणाला पाठींबा देण्यासाठी  उमरगा तालुक्यातील कवठा येथे बुधवारी (ता.एक) सरकारची प्रतिकात्मक अंत्ययात्रा काढण्यात आली. या अंत्ययात्रेत कवठा गावातील हजारो महिला व पुरुष ग्रामस्थांनी आपला सहभाग घेतला.

मराठा समाजाला आरक्षण मिळावे व अंतरवली सराटी येथे मनोज जरांगे पाटील यांच्या उपोषणाला पाठींबा देण्यासाठी समाजसेवक विनायकराव पाटील यांनी २५ ऑक्टोबर पासून अमरण उपोषण सुरु केले आहे. त्यांच्या उपोषणाचा पाच दिवस आहे. पाटील यांची प्रकृति खालावली आहे. त्यामुळे कवठा ग्रामस्थ व परिसरातील मराठा समाज बांधव आक्रमक झाले आहेत.

बुधवारी मुख्यमंत्री, उपमुख्यमंत्री यांच्या प्रतिकात्मक प्रतिमा तयार करून ग्रामस्थांच्या वतीने संपूर्ण गावातून प्रतिकात्मक अंत्ययात्रा काढण्यात आली. या प्रतिकात्मक अंत्ययात्रेत महिलांचा लक्षवेधी सहभाग होता. एक मराठा लाख मराठा, आरक्षण आमच्या हक्काचं नाही कुणाच्या बापाचं या विविध घोषणा देत तरुण - तरुणीने अंत्ययात्रेत आक्रमक रूप धारण केल्याचे दिसून आले.

गावा बाहेरील वेशीतून हि अंत्ययात्रा लातूर - उमरगा रस्त्यावर नेण्यात आली. त्या ठिकाणी सरण रचून सरकारच्या प्रतिकात्मक प्रतिमांचे दहन करण्यात आले. दरम्यान मनोज जरांगे पाटील यांनी विनायकराव पाटील यांच्याशी दूरध्वनी वरून संपर्क साधून आरक्षणाचा लढा शांततेच्या मार्गाने सुरु ठेवण्याचे अवाहन श्री. पाटील यांना केले. तीन नोव्हेंबर पर्यंत मराठा आरक्षणाचा निर्णय न झाल्यास विनायकराव पाटील यांनी जीवंत समाधी घेण्याचा निर्धार केला आहे.

त्यांच्या निर्णयावर ठाम असल्याचे त्यांनी सांगितले आहे. बुधवारी पुन्हा संपूर्ण कवठा गावातील ग्रामस्थांनी आपल्या चुली बंद ठेवून पाटील यांच्या उपोषणाला पाठींबा दिला. अंत्ययात्रेच्या प्रसंगी एका काळ्या रंगाच्या श्वानाच्या गळ्यात अँड. गुणरत्न सदावर्ते यांच्या नावाचा बांधण्यात आलेला फलक विशेष लक्षवेधी होता.