विरोधकांनी शेतकऱ्यांच्या सुखाआड येऊ नये : ठाकरे

परंडा (उस्मानाबाद) : राज्यातील शेतकऱ्यांसाठी सरकारची विमा कंपनी स्थापन करणार असून, विरोधकांनी शेतकऱ्यांच्या सुखाच्या आड येऊ नये, असे मत शिवसेनेचे पक्षप्रमुख उद्धव ठाकरे यांनी व्यक्त केले. 

परंडा मतदारसंघातील महायुतीचे उमेदवार प्रा. तानाजी सावंत यांच्या प्रचारार्थ सोमवारी (ता. 14) येथे झालेल्या सभेत ते बोलत होते. प्रा. सावंत, खासदार ओमप्रकाश राजेनिंबाळकर, भाजपचे प्रदेश सरचिटणीस आमदार सुजितसिंह ठाकूर, माजी आमदार पाशा पटेल, ज्ञानेश्वर पाटील, संजय गाढवे, शंकर बोरकर, दत्ता साळुंके, गौतम लटके, प्रशांत चेडे, बाळासाहेब पाटील हाडोंग्रीकर, अण्णासाहेब देशमख, विजयसिंह थोरात, सुभाषसिंह सद्दीवाल, अनिल सावंत, धनंजय सावंत, ऍड. सुभाष मोरे, ऍड. संतोष सूर्यवंशी आदी उपस्थित होते. 

शरद पवार यांनी शेतकऱ्यांना योग्य वेळी मदत केली असती तर राज्याचे हाल झाले नसते. पवार अनेकवेळा मुख्यमंत्री झाले. त्यांच्या राजकारणाची सुरवात वसंतदादांचे सरकार पाडून झाली. त्यामुळे त्यांना सरकार पाडण्याचा अनुभव असल्याची टीका ठाकरे यांनी केली. प्रचारात पंतप्रधान, मुख्यमंत्र्यांचे फोटो दिसत असले, तरी पाच वर्षांत झालेल्या विकासात शिवसेनेचा वाटा आहे. सरकारमध्ये असलो तरी चुकीचे वाटल्यास बोलतच राहणार. पुन्हा युतीचीच सत्ता येणार आहे, असे सांगून त्यांनी शिवसेनेच्या वचननाम्यातील काही बाबींचा उल्लेख केला. 
 
"निवडणूक म्हणजे बतावणी नव्हे' 
प्रचारसभांत राष्ट्रवादी कॉंग्रेसचे अध्यक्ष शरद पवार हे विशिष्ट हातवारे करीत मुख्यमंत्र्यांच्या वक्तव्याला उत्तर देत आहेत. मुख्यमंत्री देवेद्र फडणवीस हेही त्यांना प्रत्युत्तर देत आहेत. दोघांतील जुगलबंदीचा थेट उल्लेख न करता, ठाकरे यांनी "निवडणूक म्हणजे तमाशातली बतावणी नव्हे' अशा शब्दांत संदेश देण्याचा प्रयत्न केला. उमेदवार प्रा. सावंत, खासदार राजेनिंबाळकर, आमदार ठाकूर, पाशा पटेल आदींनी मनोगत व्यक्त केले.