उस्मानाबादच्या शिक्षणाधिकाऱ्यांना उच्च न्यायालयाने का बजावली नोटीस? 

औरंगाबाद : शिक्षकांच्या सेवाज्येष्ठतेच्या संदर्भातील आदेशाचा अवमान केल्याप्रकरणात उस्मानाबादच्या शिक्षणाधिकाऱ्यांना (माध्यमिक) मुंबई उच्च न्यायालयाच्या औरंगाबाद खंडपीठाचे न्यायमूर्ती प्रसन्न वराळे व न्यायमूर्ती आर. जी. अवचट यांनी नोटीस बजावली आहे. 

हेही वाचा- ...म्हणून मराठवाड्यात रेल्वेने प्रवास करताना घाबरतात प्रवाशी : कारण वाचून तुम्हीही प्रवास टाळाल

याप्रकरणी लक्ष्मण चंदू राठोड यांनी ऍड. रामराव बिरादार यांच्यामार्फत याचिका दाखल केली आहे. त्यानुसार लक्ष्मण राठोड हे उमरगा तालुक्‍यातील गुंजोटी येथील श्रीकृष्ण सेकंडरी ऍण्ड हायर सेकंडरी स्कूलमध्ये 1 जुलै 1987 पासून कार्यरत आहेत. त्याच संस्थेत शिक्षक शिवानंद बुदाले हे 2 जुलै 1990 पासून कार्यरत आहेत. यामध्ये राठोड यांना सेवाज्येष्ठतेनुसार मुख्याध्यापकपदी नियुक्ती मिळणे अपेक्षित होते. मात्र, शिक्षणाधिकाऱ्यांनी राठोड यांच्याऐवजी बुदाले यांच्या मुख्याध्यापकपदावर शिक्कामोर्तब केले.

हे वाचलंत का?-राज्याच्या महाधिवक्‍त्यांसह बीडच्या जिल्हाधिकारी, तहसीलादारांना न्यायालयाने का बजावल्या नोटीसा? वाचा नेमकं प्रकरण

यासंदर्भात औरंगाबाद खंडपीठाने 21 जानेवारीरोजी शिक्षणाधिकाऱ्यांनी सुनावणी घ्यावी, तसेच सेवा ज्येष्ठता यादी दोन महिन्याच्या आत ठरवून घेऊन संबंधित प्रकरणाच्या प्रस्तावावर निर्णय घ्यावा, असा आदेश दिला होता. त्यानुसार सुनावणी न घेता बुदाले यांना मुख्याध्यापकपदी नियुक्तीचा आदेश काढला. त्यावर लक्ष्मण राठोड यांनी खंडपीठाच्या आदेशाची अवमान याचिका दाखल केली आहे. त्यावर गुरुवारी सुनावणी झाली असून खंडपीठाने वरील आदेशानुसार नोटीस बजावली आहे. पुढील सुनावणी पाच आठवड्यांनी अपेक्षित आहे. 

क्लिक करा- आधीचेच खड्डे बुजविण्यासाठी शासनाचे दोन कोटी खड्ड्यांत : आमदार प्रशांत बंब यांनी ठोठावले खंडपीठाचे दरवाजे.