अबब... करापोटी दिली चक्क सोळा हजारांची चिल्लर

औंढा नागनाथ( जि. हिंगोली) : येथील नगर पंचायतीतर्फे मार्च एन्डिंगमुळे घरपट्टी, नळपट्टीसह विविध करांच्या वसुलीचे काम हाती घेण्यात आले आहे. बुधवारी (ता. १८) एका थकबाकीदाराने वसुलीसाठी आलेल्या कर्मचाऱ्यांच्या हातावर कराची तब्बल १६ हजार रुपयांची चिल्लर दिली. चिल्लर मोजताना मात्र, कर्मचारी घामाघूम झाले होते.

औंढा नागनाथ शहरातील नागरिकांकडे नगर पंचायतीची घरपट्टी, नळपट्टी थकीत करापोटी ९८ लाख रुपयांची रक्‍कम येणे बाकी आहे. नगर पंचायतीतर्फे शहरात घरोघरी जाऊन कर्मचारी कराची रक्‍कम वसूल करीत आहेत. आजपर्यंत ६५ लाख रुपयांची वसुली झाली असून बुधवारपर्यंत (ता.२५) वसुली जमा करण्याच्या सूचना दिल्या आहेत. त्‍यानंतर जप्तीच्या नोटिसा देण्यात येणार आहेत. 

हेही वाचा - वारंगा फाटा येथे गव्हाचा ट्रक पेटला

६५ लाख रुपायांची वसुली

दरम्‍यान, पालिका प्रशासनाने कराची रक्‍कम वसुली संदर्भात मुख्याधिकारी निशीकांत प्रचंडराव यांच्या मार्गदर्शनाखाली तीन पथके नेमली आहेत. ही पथके वसुली करीत आहेत. यातील ६५ लाख रुपायांची वसुली झाल्याचे पथक प्रमुख कर निरीक्षक उत्तम जाधव यांनी सांगितले. दरम्यान, पालिकेने तयार केलेल्या पथकात श्री. जाधव यांच्यासह हरिहर गवळी, विजय महामुने, विष्णू रणखांबे, मंजुषा राठोड, नलिनी मलमवार, राधा काळे, अनिल नागरे, मनोहर रणखांबे, नागेश गुरुकिल्ले, लतीफ काजी यांचा समावेश आहे. दरम्यान, हे पथक बुधवारी कराच्या थकीत वसुलीसाठी गेले होते. थबबाकीदाराने कर्मचाऱ्यांच्या हातावर तब्बल सोळा हजारांची चिल्लर दिली. या चिल्लरमध्ये एक रुपया, दोन रुपये व पाच रुपयांच्या नाण्यांचा समावेश होता. हे चिल्लर मोजताना कर्मचाऱ्यांच्या मात्र चांगलेच नाकीनऊ आले होते.

पोल्‍ट्री व्यावसायिकांविरुद्ध गुन्हा दाखल

औंढा नागनाथ: तालुक्‍यातील दरेगाव येथील एका पोल्‍ट्री फार्मचालकांविरुद्ध मंगळवारी (ता. १७) औंढा पोलिस ठाण्यात गुन्हा दाखल झाला आहे. दरेगाव येथील जगदंबा पोल्‍ट्री फार्मचे लक्ष्मण जाधव, दुर्गादास राठोड यांनी कोरोनाच्या पार्श्वभूमीवर (ता.१२) रोजी २१ हजार कोंबड्या जमिनीत पुरल्या असल्याची माहिती जिल्‍हाधिकारी, तहसीलदार व पोलिस ठाण्यात निवेदनाद्वारे दिली होती. तसेच त्‍याचे शासनाने अनुदान द्यावे, अशी मागणी केली होती. या बाबत जिल्‍हाधिकारी रुचेश जयवंशी यांनी गंभीर दखल घेत पोलिस निरीक्षक वैजनाथ मुंडे यांना चौकशी करण्याचे आदेश दिले. 

येथे क्लिक करा- हिंगोलीत पुन्हा दोन ‘कोरोना’ संशयित आढळले

 प्रशासनाला दिली खोटी माहिती

त्‍यावरून श्री. मुंडे यांनी मंगळवारी (ता. १७) प्रत्‍यक्ष पोल्‍ट्री फार्मवर जावून पाहणी केली असता आठ हजार कोंबड्या जिवंत असल्याचे आढळून आले. त्‍यामुळे कोंबडी उत्‍पादकांना २१ हजार पक्षी खड्ड्यांत गाडल्याची खोटी माहिती दिली असल्याचे निदर्शनास आहे. जेसीबीच्या मदतीने तीन हजार कोंबड्या जमिनीत गाडल्याची माहिती चौकशीत समोर आली. कोंबडी उत्‍पादकाने शासनाकडून अनुदान मिळावे म्‍हणून प्रशासनाला खोटी माहिती देत अनुदानाची मागणी केली. याप्रकरणी लक्ष्मण जाधव, दुर्गादास राठोड या दोघांवर औढा पोलिस ठाण्यात पोलिस निरीक्षक वैजनाथ मुंडे यांच्या फिर्यादीवरून गुन्हा दाखल करण्यात आला आहे. पुढील तपास ए. जी. पठाण हे करीत आहेत.