वृध्दाचा शेतात तर दुसऱ्याचा शेतीच्या वादातून भररस्त्यात खून

सेनगाव ः तालुक्‍यातील बरडा येथे शेतात पिकाची राखण करण्यासाठी गेलेल्या एका वृद्धाचा खून झाल्याची घटना शुक्रवारी (ता. दहा) घडली. तर दुसरी घटना औंढा नागनाथ तालुक्यातील साळणा येथे जुन्या शेतीच्या वादावरून एकाचा भरदिवसा चाकूने भोसकून खून झाल्याची घटना शुक्रवारी (ता. दहा) घडली आहे. दोन्ही घटनांनी जिल्हा हादरून गेला आहे. 

सेनगाव तालुक्‍यातील बरडा येथील वामन लक्ष्मण शेंडगे (वय ६५) हे गुरुवारी (ता. नऊ) रात्री शेतात वन्य प्राण्यांपासून पिकांचे राखण करण्यासाठी गेले होते. शुक्रवारी ते सकाळी घरी न आल्यामुळे त्यांचा मुलगा ज्ञानेश्वर शेंडगे शेतात गेला. त्या वेळी वामन शेंडगे यांचा मृतदेह रक्तबंबाळ अवस्थेत आढळून आला. डोक्यावर व चेहऱ्यावर ठिकाणी गंभीर स्वरूपाच्या जखमी आढळल्या. सदरील माहिती सेनगाव पोलिसांना कळताच पोलिस निरीक्षक सरदारसिंग ठाकूर, पोलिस निरीक्षक श्री. माखणे, कर्मचारी अनिल भारती, महादेव शिंदे, भीमराव चिंतारे, श्री. राठोड, श्री. खंदारे हे तत्काळ घटनास्थळी दाखल झाले. पंचनामा करून मृतदेह उत्तरीय तपासणीसाठी पाठविण्यात आला आहे. या प्रकरणी पोलिसात गुन्हा दाखल करण्याची प्रक्रिया सुरू होती. 

हेही वाचा - पस्तीस विद्यार्थ्यांना अन्नातून विषबाधा

सात दिवसांपूर्वी तळणीत झाला होता खून 
तालुक्यातील तळणी येथे सात दिवसांपूर्वी (ता. चार) मथुराबाई पांडुरंग कोरडे (वय ६५) या वृद्ध महिला गावापासून काही अंतरावर शेतात शेळ्यांची पिल्ले चालण्यासाठी गेल्या होत्या. सायंकाळी उशिरापर्यंत मथुराबाई घरी न आल्याने त्यांचे कुटुंबीय व गावकऱ्यांनी शोधाशोध केली असता रात्री दहा वाजता तुरीच्या ओळीत मृतदेह आढळला होता. त्या वृद्ध महिलेचा रुमालाने गळा आवळून खून करून दागिने चोरून नेल्याची घटना घडली होती. याप्रकरणी आरोपीचा तपास पोलिसांकडून सुरू असून ही घटना ताजी असतानाच बरडा येथील ६५ वर्षीय वृद्धाच्या खुनाची घटना घडली आहे.

हेही वाचा - शिवशाही बस ट्रकवर आदळळी, सहाजण जखमी

शेत शिवारात जाणाऱ्या शेतकऱ्यांमध्ये भीती
सहा वर्षांपूर्वी सिरियल किलरच्या घटना नांदेड, परभणी, हिंगोली या तीन जिल्ह्यांत घडल्या होत्या. सिरियल किलरच्या आठवणी दोन्ही खुनांच्या घटनेमुळे ताज्या झाल्या असून एकच खळबळ उडाली आहे. शेत शिवारात जाणाऱ्या शेतकऱ्यांमध्ये या प्रकारामुळे प्रचंड दहशत निर्माण झाली आहे. पोलिस प्रशासनासमोर खुनाचा तपास लावण्याचे मोठे आव्हान उभे राहिले आहे. 

साळणा येथे भरदिवसा चाकूने भोसकून खून
औंढा नागनाथ ः तालुक्यातील साळणा येथे जुन्या शेतीच्या वादावरून एकाचा भरदिवसा चाकूने भोसकून खून झाल्याची घटना शुक्रवारी (ता. दहा) घडली आहे. औंढा नागनाथ तालुक्यातील साळणा येथील कुंडलिक तातेराव कुटे (वय ५६, रा. साळणा) हे सकाळी अकरा वाजता बसस्थानकावर आले असता येथे माधव दराडे, सोपान दराडे, विठ्ठल दराडे, उद्धव दराडे, गणेश दराडे (सर्व रा. साळणा) यांनी गैरकायद्याची मंडळी जमवून जुन्या शेतीच्या वादाच्या कारणावरून कुंडलिक कुटे यांना धारदार लोखंडी चाकूने छातीवर, गळ्यावर, पाठीवर जीवे मारण्याच्या उद्देशाने गंभीर वार करून जखमी केले व इतरांनी धरून लाथाबुक्‍या मारल्या व गंभीर जखमी करून जीवे मारून खून केला. 

साळणा प्रकरणात चार आरोपींना केली अटक
मयताचा मुलगा प्रदीप कुंडलिकराव कुटे यांनी औंढा पोलिस ठाण्यात दिलेल्या फिर्यादीवरून पाच जणांच्या विरोधात गुन्हा दाखल झाला आहे. यात पाच आरोपींपैकी चार आरोपींना पोलिसांनी ताब्यात घेऊन त्‍यांना अटक केली आहे. तपास पोलिस निरीक्षक व्ही. के. मुंडे हे करीत आहेत.