Parbhani News :मानवी तस्करीचा छडा लावणाऱ्या पोलिसांचा गौरव

परभणी - मानवी तस्करीचा छडा लावून थेट तेलंगणा व आंध्रप्रदेश राज्यातील हैदराबाद व विजयवाडा येथील आरोपींची टोळी अटक करणाऱ्या जिल्ह्यातील पोलिस अधिकारी व कर्मचाऱ्यांचा रविवारी (ता.२७) शासन आपल्या दारी या कार्यक्रमात कुलगुरु डॉ. इंद्र मणी यांच्या हस्ते विशेष गौरव करण्यात आला.

जिल्ह्यातून छोट्या मुलांना पळवून नेऊन तेलंगणा व आंध्रप्रदेश राज्यात विक्री केली जात होती. या प्रकरणी परभणीच्या पोलिस अधिक्षक रागसुधा आर. यांच्या मार्गदर्शनाखाली अनैतिक मानवी वाहतूक प्रतिबंधक कक्ष स्थापन करण्यात आला होता. या कक्षाअंतर्गत पोलिस अधिकारी व कर्मचाऱ्यांनी छडा लावत रेस्क्यू ऑपरेशन करून अनेक आरोपींना अटक केली.

केवळ आरोपींना अटकच केली नाही तर पाच बालकांची सुटका करून त्यांना पालकांकडे सुपूर्द ही केले. या उत्कृष्ट कामगिरीची दखल राज्य शासनाने ही घेतली.

राज्यभरात या प्रकरणाची चर्चा होत होती. या प्रकरणात काम करणारे स्थानिक गुन्हे शाखेचे पोलिस निरीक्षक वसंत चव्हाण यांच्यासह अनैतिक मानवी वाहतूक प्रतिबंधक कक्षाच्या फौजदार राधिका गिरधर भावसार, सहायक पोलिस उपनिरीक्षक शेख शकील शेख अहमद शासन आपल्या दारी या कार्यक्रमाअंतर्गत रविवारी गौरविण्यात आले.