हिंगोलीत दिलासा: आणखी तीन रुग्ण कोरोनामुक्त

हिंगोली : हिंगोली जिल्ह्यात कोरोनाबाधित आढळलेले व सध्या औरंगाबाद येथे उपचार घेत असलेले एसआरपीएफच्या तीन जवानांचा अहवाल निगेटिव्ह आल्याने त्यांना शनिवारी (ता.१६) रुग्णालयातून घरी सोडण्यात आल्याची माहिती जिल्हा रुग्णालय प्रशासनाने दिली. त्यामुळे आतापर्यंत ८४ जण कोरोनामुक्त झाले असून कोरोनाबाधित सात रुग्णांवर उपचार सुरू आहेत.

जिल्हाभरात एकूण ९१ कोरोनाबाधित रुग्ण आढळून आले होते. त्यामुळे प्रशासनासह, नागरिकही हादरुन गेले होते. मात्र, रुग्णांना योग्य उपचार मिळत आहेत. तसेच जिल्हा प्रशासन, पोलिस कर्मचारी, स्वच्छता कर्मचारी अहोरात्र परिश्रम घेत आहेत. 

हेही वाचा - कोरोनाच्या दहशतीने पुणे येथून आलेल्या ग्रामस्थांना पाणीही मिळेना

रुग्ण ठणठणीत बरे

त्यामुळे कोरोनाबाधितांचा आकडा वाढला नाही. तसेच जिल्हा रुग्णालयातील आयसोलेशन वार्डात उपचार घेत असलेले कोरोनाबाधित ३३ रुग्ण ठणठणीत बरे झाल्याने त्यांना शुक्रवारी घरी सोडण्यात आले. 

धूत हॉस्पिटलमध्ये सहा रुग्ण

त्यानंतर औरंगाबाद येथे धूत हॉस्पिटलमध्ये उपचार घेत असलेल्या एसआरपीएफच्या तीन जवानांचा अहवाल निगेटिव्ह आल्याने त्यांना शनिवारी रुग्णालयातून घरी सोडण्यात आले आहे. आता केवळ सात कोरोनाबाधित रुग्ण असून त्यात औरंगाबाद येथील धूत हॉस्पिटलमध्ये सहा रुग्ण असून जिल्हा रुग्णालयात एक रुग्ण उपचार घेत आहे.

३३ संशयितांचे अहवाल प्रलंबित

 त्यांची प्रकृती स्थिर असून कोणतीही गंभीर लक्षणे नाहीत. दरम्यान, जिल्हा रुग्णालयातील आयसोलेशन वार्ड, जिल्ह्यातील कोरोना केअर सेंटरमध्ये एकूण एक हजार ४३६ संशयितांना भरती करण्यात आले होते. त्यापैकी एक हजार ३१९ संशयितांचे अहवाल निगेटिव्ह आले आहेत. यातील एक हजार ३१९ जणांना रुग्णालयातून घरी सोडण्यात आले आहे. सद्यस्थितीला १११ संशयित भरती असून यातील ३३ संशयितांचे अहवाल प्रलंबित आहेत.

येथे क्लिक करा - हिंगोलीत ८१ योद्ध्यांनी कोरोनाला हरविले

‘आरोग्य सेतू’ ॲपची होणार मदत

जिल्ह्यातील नागरिकांनी घराबाहेर पडू नये, अत्यावश्यक सेवा वगळता इतरांना घरीच थांबून मोलाचे सहकार्य करावे, असे आवाहन जिल्हा आरोग्य विभागातर्फे करण्यात आले आहे. तसेच  आपल्या सभोवताली कोरोनाबाधित रुग्ण असल्यास माहिती मिळण्यासाठी ‘आरोग्य सेतू’ ॲप डाउनलोड करावे, असे आवाहनही करण्यात आले आहे.

शाळांमध्ये सुविधा देण्याची मागणी

कोरोनाच्या पार्श्वभूमीवर मोठ्या शहरात गेलेले ग्रामस्थ गावाकडे परतत आहेत. गावात आल्यानंतर त्यांना गावातील शाळेत कॉरंटाइन करण्यात येत आहे. मात्र, शाळेत या ग्रामस्थांना सुविधा दिल्या जात नसल्याचा आरोप बाहेरगावाहून आलेले ग्रामस्थ करीत आहेत.