नांदेडात वाळू माफियांचा पुन्हा हल्ला 

लोहा (जिल्हा नांदेड) : राज्यात दिवसेंदिवस वाळू माफियांच्या गॅंगने सरकारी अधिकारी कर्मचारी यांच्यावर हल्ला करणे, अवैध वाळूची तस्करी करणे नित्याचे झाले आहे. यात लोह्यात हाच प्रकार (ता. २४) मध्यरात्रीच्या एक वाजता घडला. वाळूमाफियाने अवैध वाळूचा ट्रक हायवा घेऊन बेनाळ येथे जात असताना लोहा तहसील कार्यालयातील अवैध वाळू व गौण खनिज प्रतिबंधक पथकाच्या गाडीवर हल्ला करून गाडीच्या काचा फोडल्या. तसेच कर्मचाऱ्यांना धक्काबुक्की करून अंगावर गाडी घालून ठार मारण्याचा प्रयत्नही करण्यात आला. 

याबाबत पोलिसांनी दिलेली अधिक माहिती अशी की, गुरूवारी (ता. २४) मध्यरात्री एकच्या सुमारास तहसीलदाराने नेमलेल्या अवैध गौण खनिज प्रतिबंधक पथकाने अवैधरीत्या उत्खनन व वाहतूक प्रतिबंधक पथकातील तलाठी एम .जी. पवार कलंबर बुद्रुक कापशी, तलाठी जी. जे. टेळकीकर, तलाठी एन. सुदगीरवार (कारेगाव), वाहनचालक कृष्ण भगवान मंडोले हे शासकीय वाहन क्रमांक ( एम. एच. २६- बीसी- ५७५१) या शासकीय वाहनाने बेनाळ (ता. लोहा) येथे पोहोचले. हायवा ट्रक क्रमांक (एम. एच. २६- ८८४९) ज्यामध्ये पाच ब्रास वाळू भरलेली होती. 

हेही वाचा -  प्रबोधनकार ते आदित्य, ठाकरे कुटुंबातील चौथी पिढी काय करते? वाचा....

सात जणांवर गुन्हा दाखल

या वाहनाला पकडून दंडात्मक कारवाई करीत असताना हायवा ट्रक क्रमांक( एम. एस. २६- ८८४९) माझा आहे म्हणून समोर आलेले संतोष व त्याचे चुलत बंधू मारुती वरपडे व इतर पाच जणांनी धक्का बुक्की केली. आम्ही सदर वाळू बाबतीत वैध वाहतूक परवाना आहे का? असे विचारले. त्यांच्याकडे कोणताही वैध वाहतूक वाळू परवाना मिळून आला नाही. त्यामुळे आम्ही सदर वाळूने भरलेला हायवा ट्रक पोलीस स्टेशनवर येथे घेऊन येण्यास सांगितले. त्यावेळी गाडी मालक संतोष वरपडे व मारुती वरपडे व इतर पाच जणांनी शासकीय वाहनाचे वाहन चालक श्रीकृष्ण मंडोले यांना धक्काबुक्की केली. तसेच पांढऱ्या रंगाची ( टियुव्ही ३००) चार चाकी वाहन अंगावर घालून जीवे मारण्याचा प्रयत्न केला. 

प्रसंगावधान राखल्याने अनर्थ टळला

त्यामुळे प्रसंगावधान ओळखून तलाठी एम. जी .पवार, तलाठी जी. जे., तलाठी सुंदगिरवार व वाहन चालक श्रीकृष्ण मंडोले हे सर्वजण शासकीय वाहनाने पोलीस स्टेशन येथे येत असताना आरोपी संतोष वरपडे, मारुती वरपडे व इतर पाच जणांनी त्यांच्यावर व शासकीय वाहनावर दगडफेक केली. त्यात गाडीच्या काचा फोडून शासकीय वाहनांचे नुकसान झाले. त्यामुळे संतोष वरपडे, मारूती वरपडे व इतर पाच जणांविरोधात तहसीलदार लोहा विठ्ठल परळीकर यांनी दिलेल्या फिर्यादीवरून गुन्हा दाखल केला आहे.

येथे क्लिक करा -  वंचित’च्या बंदला नांदेडमध्ये प्रतिसाद

वाळू माफियांच्या मुसक्या आवळा

लोहा तालुक्यासहीत नांदेड जिल्ह्यात सन  २०१९-२० या वर्षासाठी रेती घाटाचे शासकीय टेंडर सुटले  नसल्यामुळे लोहा तालुक्यातील गोदावरी नदीपात्रातून पेनुर, अंतेश्वर, भारसावडा, शेवडी, बेटसांगवी  हातणी, येळीसह आदी ठिकाणी वाळू माफियाने लाखो ब्रास रेतीचा अवैध उपसा करून शासनाला करोडो रुपयांचा चुना लावला आहे. शासनाचा करोडो रुपयांचा महसूल बुडविला आहे. अनेक ठिकाणी हजारो ब्रास रेतीचा अवैध साठा जमा करून त्याची अवैधरित्या वाळू माफिया हे हायवा ट्रक ट्रॅक्टरद्वारे लोहा व  सोनखेड पोलिस हद्दीतून रात्रंदिवस अवैधरित्या चोरटी वाहतूक करीत आहेत. जादा दराने वाळू विकत आहेत. आता त्यांच्यावर विभागीय आयुक्त औरंगाबाद, विशेष पोलीस महानिरीक्षक नांदेड ,जिल्हा अधिकारी नांदेड व जिल्हा पोलीस अधीक्षक नांदेड या वरिष्ठ अधिकाऱ्याने तात्काळ लक्ष देऊन त्यांच्यावर कठोर कारवाई करावी .
मारूती कांबळे, सामाजिक कार्यकर्ते, पेनुर (ता. लोहा)