Murud Fraud News : लूटूपूटूच्या एक कोटीच्या नोटा देऊन भामट्याचा मास्तरांना नऊ लाखाचा गंडा

मुरूड (जि. लातूर) - ‘एक कोटीचा ‘सीएसआर’ फंड देतो’ असे म्हणत भामट्याने शनिवारी (ता. २९) एका प्राचार्याची चक्क नऊ लाखांची फसवणूक केली. विशेष म्हणजे भातुकलीच्या खेळातील लुटूपूटूच्या एक कोटी रुपयांच्या खोट्या नोटा त्याने दिल्या. या घटनेमुळे मास्तरांची मनस्थितीच खराब झाली, त्यांनी मुरूड पोलिस ठाण्याची चक्कर मारली, मात्र तूर्तास तक्रार दिली नाही.

धाराशिव जिल्ह्यातील एका नामांकित संस्थेच्या महाविद्यालयातील प्राचार्यास एका भामट्याने फोन करून कंपनीचा सीएसआर फंड मिळवून देतो, त्या बदल्यात नऊ लाख रुपये कमीशन द्यावे लागेल, असे आमीष दाखविले. नंतर विविध कागदपत्रांची पूर्तता केल्यानंतर संबंधित प्राचार्यास मुरूड येथे कमिशनचे नऊ लाख रुपये घेऊन बोलावले.

दरम्यान, बसस्थानकासमोर पैसे घेऊन प्राचार्य आले. तेव्हा भामट्याने त्यांच्याकडून नऊ लाख रुपये घेतले. त्याच्या बदल्यात लहान मुलांच्या खेळण्यातील एक कोटीच्या नोटा असलेली बॅग दिली. दरम्यान, प्राचार्याने बॅग उघडून पाहिली. तेव्हा लहान मुलांच्या खेळण्यातील नोटा आढळल्या.

फसवणूक झाली आहे हे लक्षात येताच प्राचार्याने तात्काळ पोलिस ठाणे गाठले. प्राचार्याची आपबिती ऐकल्यानंतर सहायक पोलिस निरीक्षक अशोक उजगरे, पोलिस उपनिरीक्षक नागरगोजे यांनी लगेच पैसे घेऊन गेलेल्या व्यक्तीचा गावभर शोध घेतला, मात्र तो व्यक्ती काही सापडला नाही. तांत्रिक गोष्टी व चौकशी सुरू केली. पण दोन तासानंतर प्राचार्य ‘माझी मनःस्थिती ठीक नाही, मी नंतर येऊन फिर्याद देतो’ असे सांगून निघून गेले.

प्राचार्यांनी फसवणूक झाल्याचे सांगितल्यानंतर आम्ही पैसे नेणाऱ्या व्यक्तीचा शोध घेण्याचा प्रयत्न केला. पोलिसांनी प्राचार्यांना दिलेल्या नोटा ताब्यात घेतल्या आहेत. मात्र मनस्थिती ठीक नसल्याने प्राचार्यांनी लेखी फिर्याद दिलेली नाही. दोन दिवसांनी येऊन फिर्याद देतो असे सांगितले आहे. फिर्याद आल्यानंतर पुढील तपास करण्यात येईल.

- अशोक उजगरे, सहायक पोलिस निरीक्षक, मुरूड