Ambad News : रात्री झोपेत असताना भाऊ-बहिणीला सापाने केला दंश; बहिणीचा मृत्यू तर भावावर उपचार सूरू

अंबड - जालना जिल्हयातील अंबड शहरालगत असलेल्या पाचोड मार्गावरील म्हाडा कॉलनीतील दोन भावंडाना शनिवारी (ता. 1) भल्या पहाटे एक वाजेच्या दरम्यान घरात आई, वडिल व कुटुंबातील सदस्यांसोबत झोपेत असताना सापाने दंश केला.

यामध्ये इयत्ता दुसरी मधील शिकत असलेल्या श्रध्दा मनोहर खरात (वय-8) वर्षे या बालिकेचा उपचारादरम्यान मृत्यू झाल्याची दुर्दैवी घटना घडली आहे. तर तिचा भाऊ मकरंद खरात हा जखमी असल्याने त्याच्यावर सध्या उपचार सूरू आहे.

याबाबत सविस्तर माहिती अशी की, अंबड -पाचोड मार्गालगत असलेल्या म्हाडा कॉलनीत मनोहर खरात हे पत्नी लक्ष्मीबाई व आई, चार मुले व एक मुलगी यांच्यासोबत पत्र्याच्या बनविलेल्या शेडमध्ये राहतात. घरची अर्थिक परिस्थिती बेताची आहे. कुटूंबातील सदस्यांना पुरेशी जागा नाही.

यामुळे अपुऱ्या जागेमुळे रात्री विश्रांती पत्राच्या खोलीत व स्वयंपाक घरात रात्रीच्या वेळेस विश्रांती घ्यावी लागत आहे. नेहमीप्रमाणे खरात कुटुंब शुक्रवारी रात्री जेवण केल्यानंतर विश्रांती घेत होते. रात्रीच्या वेळेस गाड झोपेत असताना शनिवारी भल्या पहाटे एक वाजेच्या दरम्यान श्रध्दाच्या उजव्या पायाला व तिचा भाऊ मकरंद याच्या पायाला सापाने चावा घेतला होता.

थोड्याच वेळात श्रध्दाला उलटी झाल्यानंतर तिच्यावर उपचार करण्यासाठी खरात परिवारातील सदस्य व नागरीक यांनी श्रध्दाला व मकरंद यांना शहरातील उपजिल्हा रुग्णालयात उपचारासाठी दाखल करण्यात आले होते. डॉक्टरानी तपासून इंजेक्शन दिले. त्यानंतर त्यांनी श्रध्दा ला जालना येथे पुढील उपचारासाठी शासकीय रुग्णालयात दाखल करण्यासाठी पाठविले.

खरात यांनी जखमी मुलगा मकरंद याला सुद्धा जालना येथे शासकीय रुग्णालयात उपचारासाठी दाखल केले होते. यामध्ये श्रध्दावर उपचार सूरू असताना तिचा दुर्दैवी मृत्यू झाल्याची घटना घडली आहे. तर तिचा भाऊ मकरंद खरात (14 वर्षे) याच्यावर जालना शहरात उपचार सूरू असल्याची माहिती मकरंद चे वडिल मनोहर खरात यांनी दिली.

शनिवारी दुपारी दीड ते दोन वाजेच्या दरम्यान श्रध्दा खरात या बालिकेवर हिंदू स्मशानभूमीत शोकाकूल वातावरणात अंत्यसंस्कार करण्यात आले. या घटनेने सर्वत्र हळहळ व्यक्त करण्यात येत आहे. श्रध्दा खरात हि अत्यंत गुणी व शाळेत अभ्यासू बालिका असल्याचे म्हाडा कॉलनीतील तरुण व शाळेतील शिक्षकांनी सांगीतले.