ST Strike|अल्टिमेटमनंतर जालन्यातील एसटी कर्मचारी कामावर येईनात

जालना : मागील महिनाभरापेक्षा अधिक काळापासून एसटी कर्मचाऱ्यांचा विलिनीकरणाच्या मागणीसाठी संप सुरू आहे. परिवहन मंत्री अनिल परब यांनी एसटी कर्मचाऱ्यांनी सोमवारी (ता.१३) अल्टिमेटम दिल्यानंतर जालना (Jalna)जिल्ह्यातील एसटी कर्मचारी आतापर्यंत कामावर रूजू झाले नाहीत. त्यामुळे सोमवारी परतूर आगारातून तीन बस वगळता इतर जिल्ह्यातील आगारातून एक ही बस धावली नाही. जिल्ह्यात महाराष्ट्र राज्य परिवहन (MSRTC) विभागाचे कर्मचारी सात नोव्हेंबपासून विलिनीकरणाच्या मागणीसाठी संपावर गेले आहेत. त्यामुळे मागील महिनाभरापेक्षा अधिक काळापासून एसटी कर्मचाऱ्यांचा संप सुरू आहे. परिणामी जालना जिल्ह्यातून महामंडळाला प्रतिदिन मिळाणारे २४ लाखांचा महसुल बुडाला आहे. (ST Workers Strike Continue In Jalna District)

परिणामी या संपामुळे आतापर्यंत तब्बल आठ कोटी ५२ लाखांचा महसुल महामंडळाचा बुडाला आहे. तर दुसरीकडे प्रवाशांचे नाहक हाल सुरू आहेत. त्यामुळे सोमवारी कामावर हजार होण्याचा अल्टिमेटम परिवहन मंत्री अनिल परब यांनी दिल्यानंतर जिल्ह्यातील एसटी कर्मचारी संपावर ठाम असल्याचे चित्र पाहण्यास मिळाले आहे. दरम्यान सोमवारी परतूर आगारातून केवळ तीन बस धावल्या. तर जिल्ह्यातील जालना, जाफराबाद, अंबड आगारातून एक ही बस धावली नाही. त्यामुळे या संपावर तोडगा निघणार ही नाही, असा प्रश्न उपस्थित होत असून प्रवाशी मात्र एसटी कधी सुरू होणार याकडे डोळे लावून बसले आहेत.

औरंगाबाद आगाराच्या बसचा आधार

औरंगाबाद आगारातून काही बस सुरू झाल्या आहेत. त्यामुळे औरंगाबाद आगारातून औरंगाबाद-जालना दरम्यानच्या काही बस फेऱ्या सुरू झाल्या आहेत. ही बससेवा सुरू झाल्याने प्रवाशांना हा प्रमाणात आधार मिळाला आहे.