गरजूंना वाणसामानासह दोन वेळचे जेवण 

तीर्थपुरी (जि.जालना) -  कोरोना विषाणूचा संसर्ग होऊ नये म्हणून सर्वत्र लॉकडाऊनसह संचारबंदी लागू करण्यात आल्यामुळे गोरगरिबांच्या हाताला काम मिळत नाही. त्यामुळे त्यांच्यावर उपासमारीची वेळ आली आहे. त्यामुळे गरजूंना दोन वेळचे जेवण व किराणा साहित्याच्या किटची व्यवस्था जिल्हा परिषदेचे उपाध्यक्ष महेंद्र पवार यांच्या वतीने करण्यात आली आहे. 

कोरोना विषाणूचा संसर्ग होऊ नये म्हणून सर्वत्र संचारबंदी लागू करण्यात आली. गावात व परिसरात कोरोना या विषाणूच्या भीतीमुळे लोक घराच्या बाहेर येत नाहीत; परंतु गोरगरिबांच्या हाताला काम नाही अशांना दोन वेळच्या जेवणाची चिंता लागली आहे.

हेही वाचा :  कोल्हापूरहून आलेल्या ऊसतोड मजूरांची तपासणी

त्यांच्यावर उपासमारीची वेळ आली असल्याने या ग्रामस्थांना आधार देण्यासाठी दोन वेळचे जेवण व किराणा साहित्य देण्याचा निर्णय घेतला आहे. त्यामुळे परिसरातील गावातील गरजवंतांची नावे गावकऱ्यांनी द्यावीत असे आवाहन करण्यात आले.

हेही वाचा : जालना जिल्ह्यात ३२ चेकपोस्ट

तीर्थपुरी व परिसरातील गरजवंतांना दोन वेळचे जेवण व आठ दिवस पुरेल एवढे किराणा साहित्य घरपोच देण्यात येत आहे.  

पालावर जाऊन भोजनाचे पाकीट वाटप

तीर्थपुरी परिसरातील पालावर जाऊन जिल्हा परिषद उपाध्यक्ष महेंद्र पवार यांच्या वतीने गुरुवारी (ता.२) साहित्य वाटपासह भोजनाचे पाकीट देण्यात आले. 
यावेळी शिवसेनेचे माजी जिल्हाप्रमुख श्रीकृष्‍ण बोबडे, मेहेरनाथ बोबडे, नारायण बोबडे, मुख्याध्यापक सुनील अंभोरे, ग्रामविकास अधिकारी गजानन मुपडे, गणेश शिंदे, रंगनाथ मोरे,जनार्दन बारवकर, रमेश बोबडे हे उपस्थित होते. यावेळी महेंद्र पवार यांच्याहस्ते गरजूंना त्यांच्या घरपोच जाऊन आठ दिवस पुरेल इतका किराणा साहित्य व दोन वेळेचे जेवण देण्यात आले आहे. 

गोरगरीब, कष्टकऱ्यांच्या हाताला काम नाही. या भागातील अनेकांवर उपासमारीची वेळ आल्याचे लक्षात आले. त्यामुळे गरजूंना तत्काळ आठ दिवस पुरेल एवढं किराणा सहित्य व दोन वेळेस जेवण घरपोच स्वखर्चातून देण्यात येत आहे. अशा उपक्रमात परिसरातील लोकप्रतिनिधी पुढे आले पाहिजे. 
- महेंद्र पवार, 
उपाध्यक्ष, जिल्हा परिषद जालना.