Udgir News : विहिरीचे खोदकाम सुरू असताना जेसीबीच्या खाली सापडून एकाचा दुर्दैवी मृत्यू

उदगीर - उदगीर तालुक्यातील नागलगाव शेत शिवारात विहिरीचे खोदकाम करीत असताना जेसीबी मालकांचा जेसीबीखाली सापडून दुर्दैवी मृत्यू झाल्याची घटना घडली.

सूत्रांनी दिलेली माहिती अशी की, ८ मार्च रोज शनिवारी तीन वाजता नागलगाव येथील शेतकरी रामचंद्र धोंडिबा जाधव यांच्या शेतात जेसीबीने विहिरीचे खोदकाम चालू असताना जेसीबीचे मालक माधव कांबळे (वय-५२ वर्ष) राहणार खेर्डा (ता. उदगीर ) यांचा जेसीबीखाली सापडून दुर्दैवी मृत्यू झाला.

या घटनेची माहिती नागलगावचे पोलीस पाटील अंकुश वाघे यांनी ग्रामीण पोलिसांना दिली. घटनेची माहिती मिळताच ग्रामीण पोलीस ठाण्याचे पोलीस हेडकॉन्स्टेबल गजानन जगताप यांनी घटनास्थळी भेट देऊन मृतदेह रुग्णवाहिकेतून उदगीर येथील सामान्य रुग्णालयात शवविच्छेदनासाठी दाखल केले.