व्यापाऱ्याला दोन महिने कारावास

औरंगाबाद : धनादेश अनादर प्रकरणी व्यापारी प्रशांत चंद्रप्रकाश मंत्री यास दोन महिने कारावास व सहा लाख रुपये नुकसानभरपाई देण्याचे आदेश प्रथमवर्ग न्यायदंडाधिकारी डी. आर. भंडारी यांनी शुक्रवारी (ता. 11) दिले. सतीश लालचंद डोंगरे (40, रा. बेगमपुरा) यांनी तक्रार दिली होती.

तक्रारीनुसार, व्यापारी व त्याचा मित्र प्रशांत चंद्रप्रकाश मंत्री (रा. मोतीकारंजा) याने व्यवसायासाठी डोंगरे यांच्याकडून चार लाख रुपये हातउसने मागितले होते. मित्रत्वाच्या संबंधामुळे डोंगरे यांनी प्रशांतला दोन महिन्यांत पैसे वापस करण्याच्या बोलीवर कर्ज काढून व क्रेडिट कार्डवर चार लाख रुपये दिले होते. मुदत उलटल्यानंतरही त्याने पैसे देण्यास टाळाटाळ केल्याने डोंगरे यांनी पैशांसाठी तगादा लावला होता. त्यामुळे प्रशांत याने डोंगरे यांना दहा हजार रुपये रोख दिले व तीन लाख 90 हजार रुपयांचा धनादेश दिला, जो वटलाच नाही. त्यानंतर डोंगरे यांनी प्रशांतला कायेदशीर नोटीस बजावली. त्यालाही दाद न दिल्याने डोंगरे यांनी न्यायालयात धाव घेतली.

खटल्याच्या सुनावणीवेळी, डोंगरे यांनी प्रशांतला पैसे दिल्याचे व त्यासाठी कर्ज काढल्याचे न्यायालयात सिद्ध केले. दोन्ही बाजूंच्या युक्तिवादानंतर व साक्षी-पुराव्यांवरून न्यायालयाने प्रशांतला भारतीय दंड संहितेच्या 138 कलमान्वये दोन महिने कारावास व सहा लाख रुपये नुकसानभरपाई व नुकसान भरपाई एक महिन्यात न दिल्यास आणखी एक महिना कारावासाची शिक्षा ठोठावली. प्रकरणात डोंगरे यांच्या वतीने ऍड. राजू पहाडिया यांनी काम पाहिले.