महापालिकेच्या रडारवर दोन हजार इमारती

लातूर : महापालिकेचे उत्पन्न वाढीसाठी सध्या प्रशासन कामाला लागले आहे. यातून दिलेल्या परवान्यापेक्षा जास्तीचे बांधकाम किंवा परवाना न घेता केलेले बांधकामावर प्रशासनाचे लक्ष आहे. शहरात गेल्या काही महिन्यांत सुमारे सत्तर इमारतींच्या बांधकाम नियमितीकरणातून महापालिकेला साडेचार कोटींचे उत्पन्न मिळाले आहे. अशा दोन हजार इमारती आता महापालिकेच्या रडारवर आहेत.

महापालिका सुरवातीपासून आर्थिक अडचणीत आहे. सुमारे तीनशे कोटींचे कर्ज आहे. त्यामुळे आयुक्त अमन मित्तल यांनी उत्पन्न वाढीवर भर दिला आहे. गेल्या काही महिन्यांपासून त्यांनी अनधिकृत किंवा परवान्यापेक्षा अधिक बांधकाम असलेल्या इमारतींवर लक्ष केंद्रित केले आहे. यातून त्यांनी शहरातील ७९५ इमारतींना नोटीस दिल्या होत्या. त्यानंतर टप्प्या टप्प्याने संबंधितांची सुनावणी घेतली जात आहे. संबंधितांचे बांधकाम परवान्याशी संबंधित तसेच महापालिकेकडे उपलब्ध असलेल्या कागदपत्रांची तपासणी केली जात आहे. बांधकाम परवाना नसेल किंवा परवन्यापेक्षा अधिकचे बांधकाम केले असेल तर शुल्क व दंड आकारून नियमितीकरण (रेग्युलाईज) केले जात आहे.

शहरात अनधिकृत बांधकाम किंवा परवान्यापेक्षा जास्त बांधकाम केलेल्या इमारती आहेत. कायद्यानुसार अशा इमारती शुल्क व दंड नियमित करता येतात. या पुढील काळातही ही प्रक्रिया सुरु राहणार आहे. कोणावरही अन्याय होणार नाही याची काळजी घेतली जात आहे.

- अमन मित्तल, आयुक्त, महापालिका.