PM Svanidhi Yojana : ५२४ फेरीवाल्या व्यावसायिकांना बँकांमार्फत ७६ लाखाचे कर्ज वाटप

गंगापूर : केंद्र शासनामार्फत फेरीवाल्यांसाठी सुरू झालेल्या पी.एम. स्वनिधी या योजनेच्या माध्यमातून नगरपरिषद, गंगापूर अंतर्गत ५२४ फेरीवाले व्यावसायिकांना बँकांमार्फत ७६ लाखाचे कर्ज वाटप करण्यात आले आहे.

कोव्हिड कालावधीत फेरीवाला व्यावसायिकांना झालेल्या नुकसानीची दखल घेऊन केंद्र शासनाने जून २०२० मध्ये प्रधानमंत्री पथविक्रेता आत्मनिर्भर निधी योजना सुरू केली. या योजनेत प्रथम टप्प्यात १० हजार रुपये, दुसऱ्या टप्प्यात २० हजार रुपये व तिसऱ्या टप्प्यात ५० हजार रुपयांचे कर्ज देण्यात येते.

या योजनेची अतिशय उत्कृष्ट अंमलबजावणी करत नगरपरिषद गंगापूरने ५२४ व्यावसायिकांना ७६ लाख रुपयांचे कर्ज बँकांमार्फत वाटप केले आहे. या योजनेमध्ये विविध राष्ट्रीयकृत बँकांनी सहकार्य केले. योजनेमार्फत सात टक्के वरील व्याज केंद्र सरकार भरणार आहे.

तर उर्वरित व्याज लाभार्थीला भरावे लागते. या योजनेच्या यशस्वीतेसाठी मुख्याधिकारी श्रीमती पल्लवी अंभोरे यांनी प्रकल्प अधिकारी उदय जऱ्हाड यांना मार्गदर्शन केले.

नियमांचे पालन केल्यास कर्जमर्यादा वाढणार

या योजनेत १० हजारांपासून ५० हजारांपर्यंत कर्ज, नियमांचे पालन केल्यास ५० हजारांपर्यंत कर्ज मिळणार आहे, दहा हजारांचे कर्जाचे हप्ते नियमितपणे भरल्यास विक्रेत्यांना २० व त्यानंतर ५० हजारांचे कर्ज वाढून मिळेल.

 लाभार्थीचा व्यवसाय वाढविण्यासाठी आम्ही सहकार्य करतो. शहरातील पथविक्रेते, फेरीवाल्यांनी या योजनेचा लाभ घ्यावा.

- पल्लवी अंभोरे(मुख्याधिकारी)

लाभार्थ्यांनी १० हजार रुपये कर्जाचे हप्ते नियमितपणे भरून पुढील २० व ५० हजार रुपये कर्जाचा लाभ घेण्यासाठी बँकेला सहकार्य करावे.

- उदय जऱ्हाड(प्रकल्प अधिकारी)

कोव्हिड कालावधीत व्यवसाय बंद झाला होता. पीएम स्वनिधी योजनेचा लाभ मिळाल्याने व्यवसाय पुन्हा सुरु केला. प्रथम १० हजार रुपये कर्जाची नियमित परतफेड करून आता २० हजार रुपये कर्ज घेतले आहे.

 - मच्छिंद्र खाजेकर (लाभार्थी) -