Video: भाजीपाला विक्रेत्यांना मिळाली हक्काची जागा : वाचा कुठे?

परभणी ः प्रभाग क्रमांक चारमध्ये उघडा महादेव मंदिराजवळील खुल्या पटागणांत नगरसेवकांच्या पुढाकाराने भाजीपाला व फळे विक्री केंद्र बुधवारी (ता.२९) सुरू करण्यात आले असून त्यामुळे सत्तरपेक्षा अधिक विक्रेत्यांना हक्काची जागा मिळाली आहे.

जिल्हा प्रशासनाने केलेल्या आवाहनानुसार प्रभागाच्या काँग्रेस पक्षाच्या नगरसेविका श्रीमती वनमाला देशमुख व श्रीमती माधुरी बुधवंत यांच्या संकल्पनेतून उघडा महादेव परिसरातील खुल्या मैदानावर परिसरातील नागरिकांसाठी भाजीपाला व फळ मार्केट उभारण्यात आले. बुधवारी (ता.२९) जिल्हाधिकारी दीपक मुगळीकर यांनी पाहणी केली. या वेळी आमदार सुरेश वरपुडकर, बालाजी मंदिराचे महंत अखिलेशदास बाबाजी, बाळासाहेब देशमुख, विशाल बुधवंत , विश्वजित बुधवंत, अक्षय देशमुख, नगरसेवक चंद्रकांत शिंदे आदी उपस्थित होते.

हेही वाचा - व्याकूळ मातेची मुलाशी घडविली भेट

प्रतीक्षागृहाची उभारणी
या विक्री केंद्रात ७० पेक्षा अधिक स्टॉल लावण्यात आले असून त्यामुळे तात्पुरते का होईना छोट्या-मोठ्या व्यवसायिकांना उदरनिर्वाहाचे साधन तर मिळालेच तर परिसरातील नागरिकांची भाजीपाल्याची अडचन सुद्धा दूर झालेली आहे. या ठिकाणी पिण्याचे पाण्यासह गर्दी होऊ नये म्हणून प्रतीक्षागृहदेखील उभारण्यात आले. विशेष म्हणजे नगरसेवकांनी स्वखर्चाने ही बाजारपेठ उभारली असून मंडपदेखील टाकण्यात आला आहे. शारीरिक आंतर राखण्यासाठी प्रत्येक स्टॉलला कटघरे करण्यात आलेले आहे.

हेही वाचा - धक्कादायक ! तलाठ्याला फेकले नदीपात्रात

भाजीपाला घरपोच देण्याचा प्रयत्न...
रस्त्यावर, महामार्गावर भाजीपाला, फळे खरेदीसाठी मोठी गर्दी होत होती. त्यामुळे शहरातील अशा जागा शोधून त्या ठिकाणी केंद्रे सुरू करण्याचा निर्णय घेतला होता. त्यास या प्रभागाच्या नगरसेवकांनी प्रतिसाद देत भाजीपाला केंद्र उभारून जो उपक्रम राबविला तो निश्चितच स्तुत्य आहे. नागरिकांनी या ठिकाणी सोशल डिस्टन्सिंगचे अनुपालन करावे. तसेच जनतेने या परिस्थितीत आतापर्यंत केले तसे सहकार्य करावे, जेणेकरून आपले ग्रीन झोनचे स्थान अबाधित राहिले व या संकटावर मात करू, असे यावेळी जिल्हाधिकारी श्री. मुगळीकर म्हणाले. भाजीपाला घरपोच देण्याचाही प्रयत्न असल्याचे ते म्हणाले.
.