घनसावंगी,(जि. जालना) - रवना येथील अखंड हरिनाम सप्ताहानिमित्त करण्यात आलेली लोकवर्गणी कोरोना विषाणूच्या प्रादुर्भावाने उद्भवलेल्या परिस्थितीवर मात करण्यासाठी मुख्यमंत्री सहायता निधीला देण्यात आली. याबद्दल गावकऱ्यांचे सर्वस्तरांतून अभिनंदन करण्यात येत आहे.
रवना हे सोळाशे लोकवस्तीचे गाव आहे. येथे रामनवमी ते हनुमान जयंतीदरम्यान येथील हनुमान मंदिर व विठ्ठल-रुक्मिणी मंदिरात अखंड हरिनाम सप्ताहाचे आयोजन करण्यात येते. या सप्ताहात कीर्तन, जागर, हरिपाठ, विष्णुसहस्त्रनाम, श्री ज्ञानेश्वरी पारायण सोहळ्याचे आयोजन करण्यात येते. भरगच्च कार्यक्रम होतात. या सप्ताहाला यात्रेचे स्वरूप प्राप्त होते.
हेही वाचा : द्राक्षे लगडली; पण विकावी कोठे?
या सप्ताहात नियमित जेवणाच्या पंगती व या सप्ताहाचा सर्व खर्च गावकरी लोकवर्गणीतून करतात. प्रतिवर्षाप्रमाणे यंदा या सप्ताहाचे नियोजन मागील दोन ते तीन महिन्यांपासून सुरू होते. यंदा कोरोना विषाणूच्या संसर्गाच्या प्रादुर्भावामुळे देशाबरोबर राज्यात परिस्थितीने गंभीर स्वरूप धारण केले. त्यासाठी उपाययोजना म्हणून लॉकडाऊन व संचारबंदी लागू केली.
हेही वाचा : जालन्याच्या इतिहासात प्रथमच स्टील उद्योग बंद
त्यामुळे रवना येथील अखंड हरिनाम सप्ताह नाइलाजाने रद्द करण्यात आला. संचारबंदी, जमावबंदी अणि लॉकडाऊनमुळे शेतकरी, शेतमजूर व ग्रामस्थ, व्यावसायिक अडचणीत सापडले आहेत. ही बाब लक्षात घेत रवना येथील गावकऱ्यांनी लोकवर्गणीतील ५१ हजार रुपये मुख्यमंत्री सहायता निधीला दिले आहेत.
रवना येथे दरवर्षी अखंड हरिनाम सप्ताहाबरोबर विविध धार्मिक कार्यक्रम उत्साहात साजरे होतात; परंतु यंदा कोरोनामुळे सर्व धार्मिक कार्यक्रम रद्द केले आहेत. शेतकरी, शेतमजूर व नागरिक यांच्यासह इतरांवर उद्भवलेल्या परिस्थितीवर मात करण्यासाठी सप्ताहाच्या लोकवर्गणीची रक्कम मुख्यमंत्री सहायता निधीच्या खात्यावर जमा केली आहे.
- मारुतीबाबा महाराज आगरकर,
ग्रामस्थ, रवना
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.