यळकोट ...यळकोट ...जय मल्हारच्या  जयघोषात माळेगाव यात्रेला प्रारंभ

माळाकोळी (जिल्हा नांदेड) : यळकोट ... यळकोट ... जय मल्हार असा जयघोष करत...खोबरे भंडाऱ्याची उधळण... हजारो भाविकांच्या उपस्थितीत दक्षिण भारतात प्रसिद्ध असलेल्या माळेगाव (ता. लोहा, जि. नांदेड) येथील खंडोबाच्या यात्रेला उत्साहात सुरुवात झाली.
 
परंपरेप्रमाणे पालखी सोहळा नियोजीत मार्गाने दुपारी साडेतीन वाजता शासकीय विश्रामगृहात दाखल झाला. यावेळी उपस्थित मान्यवरांनी भक्तीमय वातावरणात पालखीचे स्वागत केले. देवस्वारीने माळेगाव खंडोबा यात्रेची आज सुरुवात झाली. शासकीय विश्रामगृह येथे मानकऱ्यांच्या पालखीचे मान्यवरांच्या हस्ते स्वागत व पूजन करण्यात आले व मानकऱ्यांचा सत्कार करण्यात आला. 

हेही वाचा --Video : माळेगाव यात्रेला आहे सात दशकांचा इतिहास ः कसा तो वाचा

जिल्हा परिषद अध्यक्षांसह आमदारांची उपस्थिती 

यावेळी जिल्हा परिषद अध्यक्षा शांताबाई जवळगावकर, आमदार शामसुंदर शिंदे, आमदार मोहन हंबर्डे, मुख्य कार्यकारी अधिकारी डॉ. शरद कुलकर्णी, उपाध्यक्ष समाधान जाधव, सभापती शीला निखाते, सभापती माधवराव मिसाळे, उपविभागीय अधिकारी पी. एस. बोरगावकर, उपविभागीय पोलीस अधिकारी किशोर कांबळे, माजी अध्यक्ष संभाजी धुळगुंडे, माजी अध्यक्ष आनंद गुंडले, जिल्हा परिषदेचे सदस्य प्रविण पाटील चिखलीकर, सदस्य चंद्रसेन पाटील, प्रणिता देवरे चिखलीकर, आशाताई शिंदे, सभापती सतिष उमरेकर, विजय धोंडगे, रंगनाथ भुजबळ, माणिक लोहगावे, उपसभापती बालाजी पाटील कदम, तहसीलदार विठ्ठल परळीकर, विस्तार अधिकारी शिवाजी ढवळे, परमेश्वर मुरकुटे, जनार्धन तिडके, यात्रा सचिव श्री. कोंडेकर, प्रकल्प संचालक नईम कुरेशी, सरपंच गोविंद राठोड, शिक्षणाधिकारी प्रशांत दिग्रसकर, गटविकास अधिकारी श्री फांजेवाड, देवीदास गिते आदी उपस्थीत होते. 

पारंपारीक कलावंताचा सहभाग

या वेळी पालखीचे विश्रामगृहात आगमनापूर्वी पारंपारीक कलावंत वारु, गोंधळी, देवकर, मनकवडे गोंधळी यांनी आपली कला मान्यवरांच्या समोर सादर केली. तत्पूर्वी जिल्हा परिषद अध्यक्षा शांताबाई जवळगावकर व मान्यवरांच्या हस्ते श्री खंडोबाची शासकीय महापूजा करण्यात आली. 

येथे क्लिक तर करा --‘गाव’ कारभारणीचा ‘पती’ जाळ्यात

विविध स्टाॅलचे उद्‍घाटन 

माळेगाव यात्रेत मोठ्या प्रमाणावर भाविक एकत्र येत असतात. या संधीचा फायदा घेत जिल्हा परिषद व राज्य शासनाकडून विविध स्टाॅलच्या माध्यमातून जनजागृतीपर संदेश, माहिती व पत्रक दिले जातात. विविध शासकीय योजना, स्वच्छता, शिक्षण, शेती तंत्रज्ञान, खते बियाणे, जल, मृदा संधारण यांची माहिती भाविकांना दिली जाते. या स्टाॅलचे उद्‍घाटन जिल्हा परिषद अध्यक्षा शांताबाई जवळगावकर, उपाध्यक्ष समाधान जाधव, सभापती माधवराव मिसाळे,  सभापती शीलाताई निखाते, सदस्य चंद्रसेन पाटील आदी मान्यवरांच्या हस्ते पार पडले. 

मानकऱ्यांचा सत्कार 

यावेळी शासकीय विश्रामगृह माळेगाव येथे यात्रेतील पालखीचे मानकरी यांचा परंपरेप्रमाणे मानाचा फेटा बांधून मान्यवरांच्या हस्ते सत्कार करण्यात आला. गणपतराव नाईक (रिसनगाव), नागेश महाजन (कुरुळा), व्यंकटराव पांडागळे (शिराढोण), खुशालराव भोसीकर (पानभोसी), गोविंदराव नाईकवाडे (पानभोसी) या मानकऱ्यांचा यथोचित सन्मान करण्यात आला. 

उघडून तर पहा---येथे होते घोड्याबरोबर उंट, गाढव, वळू, कुत्र्यांचीही खरेदीविक्री 

आमदार अशोक चव्हाणांची गैरहजरी 

माळेगाव यात्रेच्या पत्रिकेत शासकीय महापूजा व पालखी पूजन माजी मुख्यमंत्री आमदार अशोक चव्हाण यांच्या हस्ते होणार असल्याचे छापण्यात आले होते. मात्र, मंत्रीमंडळ विस्ताराच्या घाईगडबडीमुळे ते आज उपस्थित राहिले नाहीत. त्यांच्या हस्ते यात्रेत ता. २६ डिसेंबर रोजी पशू, अश्व, कुक्कुट प्रदर्शनाचे उद्‍घाटन कार्यक्रम होत आहे.

तगडा बंदोबस्त 

माळेगाव यात्रेच्या निमित्ताने लाखो भाविक यात्रेत दाखल होत असतात. या भाविकांच्या सुरक्षेच्या दृष्टीकोनातून यात्रेत पोलिस अधीक्षक विजयकुमार मगर, अतिरिक्त पोलिस अधीक्षक दत्ताराम राठोड यांच्या मार्गदर्शनाखाली तगडा पोलीस बंदोबस्त तैनात करण्यात आला आहे. जलद कृती दल, पोलीस कर्मचारी, होमगार्ड व अधिकारी असा बाराशेपेक्षाही जास्त कर्मचाऱ्यांचा फौजफाटा यात्रेत दाखल झाला आहे.