स्थानिक ठेकेदारांचा जेएसडब्ल्यूचा गेट बंदचा इशारा; आमदार रवीशेठ पाटील, महेंद्र दळवी यांचा पाठिंबा

वडखळ : पेण तालुक्‍यातील जेएसडब्ल्यू इस्पात कंपनीमध्ये डोलवी, वडखळ, गडब या ग्रामपंचायत हद्दीतील जवळपास 110 स्थानिक ठेकेदार 15 ते 20 वर्षांपासून काम करत आहेत. मात्र, आजमितीला पेट्रोल, डिझेलचे दर वाढत असूनही कंपनी या ठेकेदारांना दर वाढवून देत नसल्याने; तसेच स्थानिकांना डावलून बाहेरील ठेकेदारांना प्राधान्य देत असल्याने या भागातील धायरेश्वर कॉन्ट्रॅक्‍टर असोसिएशन इस्पात डोलवी या युनियनने येत्या सोमवारी जेएसडब्ल्यू कंपनीचे दोन्ही गेट बंद करण्याचा इशारा दिला आहे. युनियनच्या या निर्णयाला आमदार रवीशेठ पाटील, महेंद्र दळवी यांनी पाठिंबा दिला आहे.

वाचा हेही : सुशांतची आत्महत्या की हत्या? सीबीआयने लवकरात लवकर निकाल द्यावा; अनिल देशमुख

जेएसडब्ल्यू कंपनीतील ठेकेदारांना दर वाढवून मिळावा, स्थानिकांना ठेका मिळावा, कंपनी परिसरात कामगारांसाठी बांधलेल्या कॉलनीमध्ये स्वच्छता ठेवावी, येथील कोरोना रुग्णांचा खर्च कंपनीने करावा, बाहेरून येणाऱ्या कामगारांना क्‍वारंटाईन करावे. स्थानिक ठेकेदारांना कमी दर देयाचा व बाहेरील ठेकेदारांना जास्त दर दिला जातोय ते थांबायला पाहिजे. स्थानिकांना नोकरीत प्राधान्य देण्यात यावे आदी मागण्यांसाठी जेएसडब्ल्यू कंपनीचे गेट रोखून आंदोलन करणार असल्याचे युनियनचे अध्यक्ष संजय जांभळे यांनी पत्रकार परिषदेत सांगितले. या वेळी उपाध्यक्ष प्रभाकर म्हात्रे, प्रशांत म्हात्रे, सचिव मधुकर पाटील, वडखळ सरपंच राजेश मोकल, गडब ग्रामपंचायतीचे माजी उपसरपंच तुलशीदास कोठेकर, अनिल म्हात्रे आदींसह युनियनचे सदस्य उपस्थित होते. 

अधिक वाचा : ठाण्यातील आर्केडिया मॉलमध्ये भीषण आग; सहा दुकाने भस्मसात

आमदारांचा पाठिंबा 
पेण विधानसभा मतदारसंघाचे आमदार रवीशेठ पाटील यांनी सोमवारी होणाऱ्या गेटबंद आंदोलनाला पाठिंबा देत, वेळ आली तर तालुक्‍यातील नागरिकांचा मोठ्या प्रमाणात मोर्चा काढून स्थानिकांना कंपनीत सामावून घेण्याची मागणी करू, असे सांगितले. अलिबागचे आमदार महेंद्र दळवी यांनीही युनियनला पाठिंबा दर्शवून आपण सर्व स्थानिक आहोत, आपल्याला नोकऱ्या मिळाल्याच पाहिजेत. त्यासाठी जो निर्णय घ्याल, त्यासाठी मी तुमच्या पाठीशी असल्याचे सांगितले. 

(संपादन : उमा शिंदे)