अकरावीच्या प्रवेशाला मुदतवाढ, अर्ज करण्याची उद्या शेवटची संधी

मुंबई:  शिक्षण संचालनालयाकडून अकरावी ऑनलाईन प्रवेशाच्या प्रथम येणाऱ्या प्रथम प्राधान्य फेरी- 2 ला 16 फेब्रुवारीपर्यंत मुदतवाढ देण्यात आली आहे. यामुळे विद्यार्थ्यांना या मुदतीत आपल्या आवडीच्या महाविद्यालयात जाऊन प्रवेश निश्चित करण्याची आणखी एक संधी मिळाली असल्याची माहिती माध्यमिक व उच्च माध्यमिक शिक्षण संचालक दत्तात्रय जगताप यांनी दिली.

13 फेब्रुवारीपर्यंत अकरावी प्रवेशासाठी विद्यार्थ्यांना संधी देण्यात आली होती. मात्र मुंबई, पुणे, औरंगाबाद आदी शहरांमध्ये असलेल्या महाविद्यालयात अर्ज भरताना काही तांत्रिक अडचणी निर्माण झाल्यामुळे अनेकांचे प्रवेश पूर्ण होऊ शकले नव्हते. त्यामुळे प्रवेशापासून दूर राहिलेल्या  विद्यार्थ्यांना प्रवेश घेता यावा यासाठी विद्यार्थ्यांना 16 फेब्रुवारीपर्यंत प्रवेश अर्ज भरण्यास तसेच आपल्या आवडीच्या कनिष्ठ महाविद्यालयांमध्ये जाऊन प्रवेश निश्चित करण्याची आणखी एक संधी मिळाली आहे.

मुंबई विभागातल्या ताज्या बातम्या वाचण्यासाठी येथे क्लिक करा.

या विशेष फेरीच्या प्रवेश प्रक्रिया दरम्यान 'ज्या विद्यार्थ्यांना आपला प्रवेश रद्द करायचा आहे त्यांना 15 फेब्रुवारी सायंकाळी 6 वाजेपर्यंत करता येणार आहे. त्यानंतर त्यांना उपलब्ध असलेल्या जागा नुसार आपल्या आवडीच्या महाविद्यालयांमध्ये प्रवेश अर्ज करता येणार आहे. यासाठी विद्यार्थ्यांना 16 फेब्रुवारी रोजी सकाळी 10 वाजेपर्यंत  ऑनलाईन प्रवेश अर्ज करू शकतात. 

तसेच ज्या महाविद्यालयांसाठी अर्ज केला तेथील प्रवेश निश्चित झाल्यानंतर  संध्याकाळी 6 वाजेपर्यंत संबंधित कनिष्ठ महाविद्यालयांमध्ये जाऊन विद्यार्थी आपला प्रवेश घेऊ शकतात. मात्र विद्यार्थ्यांना प्रवेशाची ही अखेरची संधी असल्याने  या देण्यात आलेल्या मुदतीमध्ये आपले प्रवेश निश्चित करावे, अन्यथा त्यासाठी कोणालाही जबाबदार धरता येणार नाही, याची खबरदारी पालक आणि विद्यार्थ्यांनी घ्यावी, असे आवाहन शिक्षण संचालनालयाकडून करण्यात आले आहे.

हेही वाचा- मध्यरात्रीपासून टोलनाक्यावर फास्टॅग सक्ती, फास्टॅग नसल्यास भरावा लागाणार दुप्पट टोल

--------------------------

(संपादन- पूजा विचारे)

11th online admission till February 16 extended the first priority round 2