ठाणे : ठाणे महापालिकेच्या गेल्या सर्वसाधारण सभेत दिवा येथील डम्पिंग ग्राऊंडवर शास्त्रोक्त पद्धतीने कचरा विल्हेवाटीच्या प्रस्तावाला मोठ्या प्रमाणात विरोध झाल्याने हा प्रस्ताव तहकूब करण्यात आला होता. तब्बल 218 कोटी 50 लाख रुपयांचा हा प्रस्ताव पुन्हा नव्याने प्रशासनाच्या वतीने पुढील सर्वसाधारण सभेत सादर करण्यात येणार आहे. मुळात यापूर्वीचा प्रस्ताव हा येथील जमिनीच्या वापराचा फेरबदलाचा प्रस्ताव होता. हा प्रस्तावच अद्याप मंजूर करण्यात आलेला नाही. फेरबदलाचा प्रस्ताव मंजूर झालेला नसताना थेट कोट्यवधीच्या कामाचा प्रस्ताव सर्वसाधारण सभेत येणार असल्याने त्यावरून पुढील सर्वसाधारण सभेत गोंधळ होण्याची शक्यता आहे.
दिवा येथे खासगी जागेत महापालिकेकडून कचरा टाकला जातो. पण हा कचरा बेकायदेशीरपणे टाकला जात आहे. त्याला कायदेशीर रुप देण्याचा दावा करून महापालिका प्रशासनाच्या वतीने हा प्रस्ताव तयार करण्यात आला आहे. गेल्या सर्वसाधारण सभेत चुकीच्या पद्धतीने हा प्रस्ताव सादर करण्यात आल्याचा आक्षेप सर्वपक्षीय नगरसेवकांनी घेतला होता. त्यामुळे या प्रस्तावात नव्याने फेरबदल करून तो सर्वसाधारण सभेसमोर सादर केला जाणार आहे.
डम्पिंग ग्राऊंडवर योग्यप्रकारे कचऱ्याची विल्हेवाट लावली जात नसल्याने राज्य प्रदूषण महामंडळाकडून पालिकेला नोटीस बजाविण्यात आली आहे. चुकीच्या पद्धतीने सुरू असलेले हे डम्पिंग ग्राऊंड बंद न केल्यास महापालिकेला तब्बल 50 कोटी रुपयांचा दंड ठोठावण्याचा इशारा दिला आहे. तसेच त्यानंतर प्रत्येक दिवशी पाच लाख रुपये दंडात्मक कारवाई करण्याची तंबी दिली आहे. त्यामुळेच शास्त्रोक्त पद्धतीने विल्हेवाट लावण्यासाठी तब्बल 218 कोटी 50 लाखांचा खर्च करण्याचा निर्णय घेतला आहे.
गेल्या वेळेस सत्ताधारी शिवसेनेने विरोधकांना या विषयावर पाठिंबा देत प्रशासनाचा हा विषय रोखून धरला होता. पण आता नव्याने हा विषय प्रशासनाच्या वतीने सर्वसाधारण सभेत सादर होत असल्याने यावेळी कितीही विरोध झाला तरी हा प्रस्ताव मंजूर करण्याची रणनिती सत्ताधारी शिवसेनेकडून आखली गेल्याची चर्चा आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.