दादर फूलबाजारात ३०० टन कचरा

मुंबई - गणेशोत्सवात विविध प्रकारच्या फुलांना मोठी मागणी असते. दादरमधील फूलबाजारात शेकडो टन फुले येतात. त्यापैकी विकली न गेलेली फुले आणि इतर कचरा मोठ्या प्रमाणात जमा होत आहे. फूलबाजारातून दोन दिवसांत ३०० टन कचरा महापालिकेने उचलला. 

दादरच्या फूलबाजारातून मागील दोन दिवसांत तब्बल ३०० टन कचरा महापालिकेने उचलला, अशी माहिती दादर सफाई कामगार पर्यवेक्षक अरविंद गोईल यांनी दिली. गणेशोत्सवापूर्वीही सतत पाऊस पडत असल्याने बाजारात आलेली काही फुले खराब होती. अशी खराब फुले विक्रेत्यांनी आधीच फेकून दिली. त्यानंतर विक्रीपर्यंतच्या काळात खराब झालेली फुले फेकण्यात आली, असे काही विक्रेत्यांनी सांगितले. कचऱ्यात झेंडूची फुलेच अधिक होती. गणेशोत्सवापूर्वी एक-दोन दिवस तर कित्येक किलो फुले पायदळी तुडवली जात होती. 

गणेशोत्सवाच्या दिवसांत भक्त हार, आरास आणि सजावटीसाठी मोठ्या प्रमाणात फुलांची खरेदी करतात. त्या काळात दादरमधील फूलबाजारात भाविकांची मोठी गर्दी असते. सतत सुरू असलेल्या पावसात फुले भिजल्यामुळे मोठी नासाडी झाल्याने कचऱ्यात वाढ झाल्याचे सफाई कामगारांनी सांगितले. त्यातच भाविकांनी घरात वापरलेली फुले निर्माल्य झाल्यावर कचराकुंडीत टाकली. ओल्या कचऱ्याचे इमारतीच्या आवारात खतात रूपांतर करण्याचा प्रयोग अजूनही वेग घेत नाही, हेच यातून दिसले, अशी प्रतिक्रिया नागरिक व्यक्त करत होते.