अभिनेत्री शौकत आझमी यांचे वृद्धापकाळाने निधन

मुंबई : अभिनेत्री शबाना आझमी यांच्या आई प्रसिद्ध थिएटर अभिनेत्री शौकत कैफी-आझमी (९३) यांचे शुक्रवारी (ता. २२) सायंकाळी जुहू येथील राहत्या घरी वृद्धापकाळाने निधन झाले. त्यांच्या पार्थिवावर शनिवारी (ता. २३) दुपारी अंत्यसंस्कार करण्यात आले.

शबाना आझमी यांच्या आई असलेल्या शौकत कैफी-आझमी यांच्या निधनाची माहिती जावेद अख्तर यांनी दिली. या वेळी हिंदी चित्रपटसृष्टीतील काही कलाकार मंडळी उपस्थित होती. शौकत कैफी-आझमी यांनी ‘उमराव जान’ (१९८१), ‘बाजार’ (१९८२), ‘गरम हवा’ (१९७४), ‘सलाम बॉम्बे’ (१९८८) यांसारख्या हिंदी चित्रपटात महत्त्वाच्या भूमिका साकारल्या.

२००२ मध्ये प्रदर्शित झालेल्या ‘साथिया’ हा त्यांचा शेवटचा चित्रपट होता; मात्र त्यानंतर त्या त्यांच्या घरीच होत्या. प्रकृतिअस्वास्थ्यामुळे शौकत यांना कोकिळाबेन धीरूभाई अंबानी रुग्णालयात दाखल करण्यात आले होते.