Adani Electricity : अदानीच्या वीज ग्राहकांना दरवाढीचा शॉक; मे पासून प्रतियुनिट विजेचा दर वाढणार

Adani Electricity Price Hike : अदानी इलेक्ट्रिसिटीने जुलै- डिसेंबर २०२३ या कालावधीत केलेल्या वीज खरेदीवर झालेला अतिरिक्त खर्च इंधन समायोजन आकाराच्या माध्यमातून वसूल करण्यास वीज नियामक आयोगाने मंजुरी दिली आहे.

त्यामुळे उपनगरातील वीज ग्राहकांच्या प्रतियुनिट विजेच्या दरात ७० पैशांपासून १.७० रुपयांपर्यंत वाढ होणार आहे. सदरची वाढ १ मे ते ऑगस्ट अखेरपर्यंत लागू असणार आहे.

वीज निर्मिती करताना वापरल्या जाणाऱ्या इंधनाच्या दरात वाढ झाल्यास त्याची वसुली इंधन समायोजन आकाराच्या (एफएसी) माध्यमातून वसूल केली जाते. जुलै ते डिसेंबर या कालावधीत इंधनावर झालेला सुमारे ३०० कोटी रुपयांचा खर्च वसूल करण्यास मंजुरी देण्यासाठी अदानी इलेक्ट्रिसिटीने आयोगाकडे याचिका दाखल केली होती.

त्याला आयोगाने मंजुरी दिली असून, त्याचा फटका घरगुती वीज ग्राहकांना मोठा बसणार आहे. ज्या ग्राहकांचा वीज वापर ०-१०० युनिट आहे त्यांच्या प्रतियुनिट वीज दरात ७० पैशांची वाढ होईल, तर १०१-३०० युनिट वापर असलेल्या ग्राहकांच्या वीज दरात १.१० रुपये, ३०१-५०० साठी १.५० रुपये तर त्यापेक्षा जास्त वापर असलेल्या ग्राहकांच्या प्रतियुनिट वीज दरात १.७० रुपये एवढी वाढ होणार आहे.