कोरोनाचा परिणाम : आजारी कैदी कारागृहातून थेट रस्त्यावर

खारघर (बातमीदार) : आजारी अवस्थेत तळोजा कारागृहातून सोडण्यात आलेल्या एका कैद्याची संचारबंदीमुळे अन्नपाणी आणि औषधोपचारविना हाल होत आहे. तीन दिवसांपासून रस्त्यालगत असलेल्या एका मांडवाखाली पडून असल्यामुळे नागरिकांमध्ये नाराजी पसरली आहे. 'सकाळ'ने कारागृह प्रशासनाच्या निदर्शनास आणून देताच कर्मचारी पाठवून योग्य ती उपाययोजना केली जाईल, असे सांगितले. 

ठसकेदार बातमी वाचा... लॉकडाऊनमुळे मिरचीला कोरोनाचा ठसका

कोरोनाच्या वाढत्या प्रादुर्भावामुळे खबरदारीचा उपाय आणि सुरक्षेच्या कारणास्तव सर्वोच्च न्यायालयाने सात वर्षांपेक्षा कमी आणि किरकोळ शिक्षा भोगत असलेल्या कैद्यांस टप्पाटप्प्याने सोडण्याचे आदेश दिले आहे. दरम्यान, तळोजा कारागृहातून 300हून अधिक कैद्यांची सुटका करण्यात आली आहे. त्यातील एक कैदी ओवे गाव आणि टाटा हॉस्पिटल समोरील चौफुली रस्त्यालगत एका मांडवाखाली अन्न आणि औषधाविना तीन दिवसांपासून झोपलेल्या अवस्थेत आहे. या संदर्भात खारघर पोलिस आणि पनवेल पालिका प्रशासनास माहिती देऊनही कोणत्याही प्रकारची उपाययोजना केली जात नाही.

हेही वाचा.. कर्नाळा अभयारण्यात पुन्हा पशू - पक्ष्यांचे राज्य

छोटू शंकर यादव (वय अंदाजे 50, रा. झारखंड) याला वरळी मुंबई येथे पोलिसांनी चोरीच्या गुन्ह्यात अटक करून आर्थर रोड कारागृहात रवाना केले होते. मात्र, काही दिवसांपूर्वी आर्थर रोड कारागृह प्रशासनाने तळोजा मध्यवर्ती कारागृहात त्याची रवानगी केली. तीन दिवसांपूर्वीच छोटूची सुटका करण्यात आली; मात्र बाहेर सुरू असलेल्या संचारबंदीमुळे बस, रेल्वे आणि वडापाव स्टॉल बंद असल्यामुळे आणि खिशात उपचारासाठी पैसे नसल्याने त्याला रस्त्यालगत अन्न आणि औषधविना आजारी अवस्थेत पडून राहावे लागत आहे. कारागृह प्रशासनाने लक्ष देऊन अशा कैद्यांची नातेवाइकांकडे सोपविण्यात यावे, अशी मागणी नागरिकांकडून केली जात आहे. 

काळा बाजार करत असताल तर सावधान...! सविस्तर वाचा

कर्मचारी पाठवून संबंधित कैद्याला ताब्यात घेणार आहोत. त्याला रुग्णवाहिकेद्वारे वरळी येथे त्याचे नातेवाईक अथवा सहकाऱ्यांच्या स्वाधीन केले जाईल. 
- कौस्तुभ कुरलेकर, कारागृह प्रशासन अधिकारी, तळोजा मध्यवर्ती कारागृह