हुश्श... कल्याण-डोंबिवलीचे प्रदूषण कमी झाले!

कल्याण : कल्याण-डोंबिवली महापालिका हद्दीत विविध कंपन्यांमधून सुटणारा धूर, वाहतूक कोंडी, डंपिंग ग्राऊंडवरील कचरा, त्याला लागणारी आग आदी प्रकारांमुळे दोन्ही शहरांत हवेची गुणवत्ता ढासळत चालली होती. प्रदूषणात सातत्याने होत असेलेली वाढ चर्चेचा विषय ठरली होती. मात्र, कोरोना संक्रमणामुळे मार्च महिन्यापासून लॉकडाऊन सुरू झाले आणि अनपेक्षित घडले. एप्रिल महिन्यात पालिकेने केलेल्या सर्वेक्षणात वायुप्रदूषण निर्देशांक कमी झाल्याने कल्याण-डोंबिवलीकरांना दिलासा मिळाला आहे.

हेही वाचा : तुम्ही सोशल डिस्टन्सिंग पाळत नाही... त्रास मात्र पोलिसांना

कल्याण-डोंबिवली शहरातील कंपन्यांमधून सुटणारा धूर, वाहतूक कोंडीमुळे होणारे प्रदूषण आणि डंपिंग ग्राऊंडला आगी लागत असल्याने हवेची गुणवत्ता दिवसेंदिवस ढासळत चालली होती. रहिवाशांमध्ये श्वसनविकाराच्या तक्रारी वाढू लागल्या होत्या. अनेक पर्यावरणप्रेमींनी न्यायालयात सरकारी यंत्रणांविरोधात आवाजही उठवला. दरम्यान, लॉकडाऊन सुरू झाले आणि प्रदूषण कमी कमी होत गेले. सुरक्षेचा उपाय म्हणून शहरातील एमआयडीसी परिसरातील औद्योगिक कारखाने बंद झाली अन् रस्ता वाहतूकही थंडावली. त्याचे सकारात्मक परिणाम दिसून आले. 

हृदयद्रावक! फुलेविक्रेत्यांचे आयुष्य कोमजले; दैनंदिन गरजांसाठीही पैसे नाहीत

एप्रिल महिन्यात पालिकेने कल्याण रेल्वे स्थानक, कल्याण पश्चिमेतील शिवाजी चौक, कल्याण पश्चिम रामबाग, आधारवाडी डंपिंग ग्राऊंड, कल्याण पश्चिम शहाड जकात नाका , डोंबिवली फडके रोड, आणि डोंबिवली पालिका विभागीय कार्यालय परिसरात एका खासगी एजन्सीमार्फत वायुप्रदूषणाबाबत मोजणी आणि सर्वेक्षण केले. लॉकडाऊनच्या काळात प्रदूषणाचा निर्देशांक कमी आल्याचे समोर आले आहे. धूलिकण, नायट्रोजन डायऑक्साईड, अमोनिया, सल्फर डायऑक्साईड, कार्बन मोनोऑक्साईड, ओझोन आदींची तपासणी केली जाते.

हे वाचलं का? : तुरुंगातील कैद्यांच्या सुरक्षेचे काय? 

        असा आहे वायुप्रदूषण निर्देशांक
                                                             2019                एप्रिल 2020

• कल्याण रेल्वेस्थानक परिसर             76.5                  40.35 
• कल्याण आधारवाडी डंपिंग ग्राउंड     85.4                  38. 88
• कल्याण शिवाजी चौक                     80.8                  39.59
• शहाड जकात नाका                        74. 9                 41. 77 
• कल्याण रामबाग                            67.1                  43.60
• डोंबिवली पालिका                          84.1                  42.36
• डोंबिवली फडके रोड                      66.1                  31. 60