पनवेलच्या पाणीटंचाईवर अमृत योजनेचा उतारा; कंत्राटदार निवडीला मान्यता

पनवेल : महापालिका क्षेत्रात पुरेसा पाणीपुरवठा करण्यासाठी अमृत योजनेचा मार्ग मोकळा झाला आहे. या योजनेच्या कामासाठी कंत्राटदार निवडीला मंजुरी देण्यात आली असून काही महिन्यांत कामाला सुरवात होण्याची शक्‍यता आहे. 

हेही वाचा - ग्रामीण यात्रांच्या 25 कोटींच्या उलाढालीला ब्रेक; रायगड जिल्ह्यात कोरोनाचा परिणाम

पनवेल महापालिका हद्दीत दरवर्षी उन्हाळ्यात पाणीटंचाई जाणवते. ती दूर करण्यासाठी 408 कोटींची अमृत पाणीपुरवठा योजना महापालिकेने आखली आहे. मात्र मागील चार वर्षांपासून तांत्रिक अडचणीत ती अडकली होती. या संदर्भात भाजप उत्तर रायगड जिल्हा अध्यक्ष आमदार प्रशांत ठाकूर, महापौर डॉ. कविता चौतमोल, सभागृहनेते परेश ठाकूर यांनी वेळोवेळी लक्ष वेधले तसेच पाठपुरावाही केला होता. महापालिकेचे तत्कालीन आयुक्त गणेश देशमुख व विद्यमान आयुक्त सुधाकर देशमुख यांनी सचिवालयात हा विषय मांडला. या सर्व प्रयत्नांना यश येऊन महाराष्ट्र जीवन प्राधिकरणाच्या नस्तीला गती मिळाली आहे. या कामाचा कालावधी 30 महिन्यांचा आहे. जेव्हीपीआर ही कंपनी 247 कोटी रुपयांची विविध कामे पुढील महिन्यापासून सुरू करणार आहे. 

हेही वाचा - गरिब रुग्णांना मोफत उपचार द्या! धर्मादाय रुग्णालयांना ग्रामविकास मंत्र्यांचे निर्देश 

असे मिळेल पाणी 
पनवेलच्या पाणीपुरवठा योजनेमुळे 228 दशलक्ष लिटर पाण्याची उपलब्धता पाताळगंगा नदीतून पनवेलला होणार आहे. योजना पूर्णत्वास आल्यानंतर पनवेल महापालिकेला यातील 100 एमएलडी, एमएमआरडीए क्षेत्राला 19, जेएनपीटी बंदराला 40, तर सिडको वसाहतींना 69 एमएलडी पाणी मिळणार आहे. महाराष्ट्र जीवन प्राधिकरणाने महापालिका व इतर प्राधिकरणांसोबत करार करण्याची प्रक्रिया सुरू केली आहे. 
Amrut Yojana in Panvel Recognition of contractor selection 

---------------------------------------------------------

( संपादन - तुषार सोनवणे )