130 किलो वजनाचा पर्यटक  "पेब' किल्ल्यावरून घसरला 

130 किलो वजनाचा पर्यटक 
"पेब' किल्ल्यावरून घसरला 
"सह्याद्री रेस्क्‍यू'च्या प्रयत्नांमुळे बचावला 
नेरळ (बातमीदार) : पेब (विकटगड) किल्ल्यावर भटकंतीसाठी पुण्यातून आलेला 130 किलो वजनाचा तरुण मंगळवारी पाय घसरून पडला होता. "सह्याद्री रेस्क्‍यू'च्या पथकाने जीव धोक्‍यात घालून अत्यंत थरारक पद्धतीने बचाव कार्य करत त्याला रात्री उशिरा सुखरूप दरीतून बाहेर काढून जीवदान दिले. 

पुण्यातील आर्यन जेकब जॉर्ज, शुभम शहा, अमीन रेहमान (कोंढवा, पुणे) हे तिघे माथेरान दस्तुरी येथून पेब किल्ल्याच्या दिशेने निघाले होते. किल्ल्लयाच्या जवळील बोरीचा माळ येथे दुपारी आर्यन जॉर्ज या 21 वर्षीय आणि 130 किलो वजनाच्या तरुणाचा पाय घसरला. तो सुमारे 350 फूट दरीत कोसळला. या घटनेनंतर त्याच्या मित्रांनी पोलिसांना कळवले. माथेरान आणि नेरळ पोलिसांनी "सह्याद्री रेस्क्‍यू टीम'ला पाचारण केले. परिस्थितीचे गांभीर्य लक्षात घेऊन टीमचे संदीप कोळी, सुनील कोळी, वैभव नाईक, सुनील ढोले, अमित कोळी, चेतन कळंबे, अक्षय परब, उमेश मोरे हे घटनास्थळी पोहोचले. तब्बल 7 तास बचावकार्य करत रात्री जॉर्जचे प्राण वाचवले. 

अधिक वजनामुळे अडथळा 
पेब किल्ल्यावरील बचावकार्यात जॉर्जचे अधिक वजन, हा मोठा अडथळा होता. परंतु त्यावर मात करत दोराच्या साह्याने टीमने त्याला वर काढले. विशेष म्हणजे जॉर्ज किरकोळ जखमी होता. तेव्हा दस्तुरी येथे आल्यानंतर खासगी वाहनाने त्याला नेरळ येथील एका खासगी रुग्णालयात उपचारासाठी दाखल करण्यात आले. 

 जखमी जॉर्ज.