वांद्य्रातील झोपडपट्टीला भीषण आग

मुंबई - वांद्रे येथील नर्गीस दत्तनगरमधील लालमाती परिसरातील झोपडपट्टीला मंगळवारी भीषण आग लागली. आगीत 80 झोपड्या खाक झाल्या; तर दोन मुलांसह दोन महिला जखमी झाल्या आहेत.

बंद घरातील सिलिंडर स्फोटामुळे ही आग लागल्याचे समजते. त्यानंतर इतर घरांतही सात सिलिंडरचा स्फोट झाल्याने आग आणखी भडकली.

त्यानंतर आगीबरोबरच धुराचे लोटच्या लोट उसळले. या परिसरात दाटीवाटीने दोन ते तीन मजली झोपड्या असल्यामुळे अग्निशमन दलाला आग नियंत्रणात आणण्यात अडथळा येत होता. अखेर सायंकाळी पाच वाजता आगीवर नियंत्रण मिळविण्यात यश आले. 2004 पासून या ठिकाणी सात ते आठ वेळा आग लागली आहे. दीड वर्षातील ही आगीची तिसरी घटना आहे.