आयोगाच्या आदेशाला केराची टोपली

पनवेल : बीएलओ (बुथ लेव्हल ऑफिसर) म्हणून नेमणूक झालेल्या शिक्षकांना रविवारपासून मतदार स्लिप वाटण्याचे काम देण्यात आले आहे. या कामाकरिता पूर्ण वेळ सुट्टी न देणाऱ्या मुख्याध्यापकांविरोधात कायदेशीर गुन्हे दाखल करण्याचा इशारा दिल्यानंतरही पनवेलमधील अनेक शाळांनी बीएलओ शिक्षकांना पूर्ण वेळ सुट्टी दिली नाही. शाळांमध्ये आपले शिकवण्याचे काम करूनच स्लिप वाटपाचे काम करावे लागत असल्याने शिक्षकांकडून नाराजी व्यक्‍त करण्यात येत आहे.

बीएलओ म्हणून नेमणूक करण्यात आलेल्या शिक्षकांना मतदारांपर्यंत वेळेत मतदार स्लिप पोहोचवता याव्यात, याकरिता शाळांनी शिक्षकांना रविवार (ता.१३) पासून सुट्टी देण्याचे निर्देश आयोगामार्फत देण्यात आले आहेत. निवडणूक आयोगातर्फे मतदारांपर्यंत स्लिप पोहोचवण्यासाठी शिक्षकांची मदत घेण्याचा निर्णय घेण्यात आला आहे. आयोगाच्या या निर्णयानुसार पनवेल विधानसभा मतदारसंघातील विविध शाळांमधील ५७६ शिक्षकांची बीएलओ म्हणून नेमणूक करण्यात आली आहे. त्यांच्यामार्फत ५,५७,३२४ व्होटर स्लिपचे वाटप केले जाणार असल्याची माहिती निवडणूक निर्णय अधिकारी दत्तात्रय नवले यांनी दिली होती. नवले यांनी दिलेल्या माहितीनुसार स्लिप वाटप करण्याच्या कामात हलगर्जी करणाऱ्या शिक्षकांविरोधात आणि शिक्षकांना पूर्णपणे सुट्टी न देणाऱ्या शाळांवर कायदेशीर गुन्हे दाखल करण्याचा इशारा देण्यात आला आहे.