मुंबई पालिकेला कोरोना संसर्ग, कामांसाठी एफडी मोडणार?

मुंबई : आर्थिक मंदीच्या काळात सावरण्याचा प्रयत्न करणाऱ्या मुंबई महापालिकेला आता कोरोनामुळे आर्थिक संकटाला सामोरे जावे लागणार आहे. पुढच्या विकासकामांना कात्री लावून आर्थिक बजेट रुळावर आणण्यासाठी कसरत करावी लागणार आहे. त्यासाठी विविध बँकांतील ठेवी मोडण्याची वेळ पालिकेवर येईल, अशी  शक्यता प्रशासनाकडून व्यक्त केली जाते आहे.

चिंताजनक : कोरोनाचा धोका वाढला; ठाणे जिल्हात 36 नवीन रुग्णांची नोंद

जीसटी लागू झाल्यानंतर पालिकेला जकात करातून मिळणाऱ्या कोट्यवधी महसुलावर पाणी सोडावे लागले आहे. त्यामुळे मालमत्ता कर वसुलीवर प्रशासनाने भर दिला आहे.  कोट्यवधी रुपयाचा मालमत्ता कर थकलेला असून तो वसूल करण्यासाठी पालिकेची दमछाक झाली आहे. त्यात आर्थिक मंदीचा फटका  पालिकेला सहन करावा लागत आहे. 

हे वाचलं का : रायगडमध्ये पुन्हा सुरू होणार मासेमारी, मासळी स्वस्त होणार?

महसूल वाढीसाठी विविध पर्याय शोधत असतानाच कोरोनासारखा जीवघेण्या संसर्गाने थैमान घातले आहे. कोरोनाविरोधात लढण्यासाठी पालिकेची संपूर्ण यंत्रणा मैदानात उतरली आहे. कोरोनामुळे  मुंबईच्या अर्थव्यवस्थेला मोठा फटका बसला आहे. मुंबई महापालिकेचे आधीच आर्थिक  गणित कोलमडलेले असताना कोरोनाने त्यात भर टाकली आहे. येत्या काळात विकासकामांवर त्याचा आणखी परिणाम होण्याची शक्यता आहे. 

हेही वाचा : जव्हारच्या मिरचीचा तडका एपीएमसीत

वरिष्ठ अधिकाऱ्याने व्यक्त केली शक्यता...
कोरोनाच्या संकटामुळे सध्या पाणी आणि मलनिसारणायासह अत्यावश्यक सेवाच सुरू ठेवण्यात आली असून इतर कामे बंद आहेत. आगामी काळात विकासाचे मोठे प्रकल्प हाती घेताना पालिकेला आर्थिक चणचण निर्माण होण्याची भीती आहे. त्यामुळे विकासकामांसाठी पालिकेला मुदत ठेवी मोडण्याचा विचार करावा लागेल, अशी शक्यताही एका वरिष्ठ अधिकाऱ्याने व्यक्त केली.