एकाचा लोकलमध्ये, तर दुसऱ्या मुलाचा स्थानकात जन्म

पालघर - नववर्षाच्या पहिल्याच दिवशी सफाळ्यातील एका २० वर्षीय महिलेने जुळ्या बाळांना जन्म दिला आहे. विशेष म्हणजे, महिलेने दिलेल्या जुळ्या बाळांपैकी एकाचा जन्म धावत्या लोकलमध्ये, तर दुसऱ्या बाळाचा जन्म पालघर रेल्वेस्थानकातील प्रतीक्षागृहात झाला. धावत्या लोकलमध्ये प्रसूती झाल्यानंतरही दोन्ही मुले आणि त्यांची आई सुखरूप आहे. त्यांना सध्या देखरेखीसाठी ग्रामीण रुग्णालयात ठेवण्यात आले आहे.

सफाळे येथील छाया सवरा (२०) या महिलेला मंगळवारी सकाळी प्रसूतीच्या वेदना जाणवू लागल्याने तिला सफाळे येथील प्राथमिक आरोग्य केंद्रात नेण्यात आले. मात्र, प्रसूतीत काही अडचणी असल्याने डॉक्‍टरांनी तिला पालघर येथील ग्रामीण रुग्णालयात नेण्याचा सल्ला दिला. वेळ कमी असल्याने तसेच योग्य साधन उपलब्ध नसल्याने महिलेचे पती अंकुश सवरा यांनी तिला लोकलनेच पालघर ग्रामीण रुग्णालयात नेण्याचा निर्णय घेतला.

त्यानुसार सकाळी ९ वाजता त्यांनी सफाळेहून पालघर येथे जाण्यासाठी लोकल पकडली; मात्र प्रवास सुरू झाल्यानंतर पालघर स्थानक येण्यापूर्वी महिलेने एका बाळाला जन्म दिला. पालघर रेल्वेस्थानकात लोकल थांबल्यानंतर या घटनेची माहिती पालघर रेल्वे स्टेशन मास्तर यांना देण्यात आली. यानंतर सफाई कर्मचाऱ्यांपासून ते लोहमार्ग पोलिसांपर्यंत सर्व सरकारी यंत्रणा कामाला लागली. या वेळी लोकल जवळपास २० मिनीटांपर्यंत स्थानकातच थांबवून ठेवण्यात आली होती. ग्रामीण रुग्णालयाच्या डॉक्‍टरांना रेल्वेस्थानकात पाचारण करण्यात आले. एका बाळाच्या जन्मानंतरही महिलेला प्रसूतीच्या वेदना होत असल्याने प्रसंगावधान दाखवत सफाई कर्मचाऱ्यांनी तातडीने संपूर्ण प्रतीक्षालय स्वच्छ केले. ग्रामीण रुग्णालयातील डॉक्‍टरांनी प्रयत्न केल्यानंतर महिलेने दुसऱ्या बाळाला जन्म दिला. हे दोन्ही बाळ आणि त्यांची आई सुखरूप असल्याची माहिती या वेळी डॉक्‍टरांनी दिली.