COVID-19: मुंबईकर चिंतेत; रुग्णालयात दाखल होणाऱ्यांच्या संख्येत गंभीर वाढ

कोरोना प्रतिबंधाचे निर्बंध काहीसे शिथिल झाले असतानाच मुंबईतल्या कोरोना परिस्थितीबद्दल गंभीर माहिती समोर आली आहे. रुग्णालयात दाखल होणाऱ्या कोरोना रुग्णांच्या संख्येत ऑगस्टच्या पहिल्या आठवड्यापासून दुपटीनं वाढ झाली आहे. गेल्या सात दिवसांत ही अकस्मित आणि मोठी वाढ झाली आहे. (Covid 19 Updates in Mumbai)

कोरोना रुग्णांमध्ये अचानक झालेली ही वाढ गंभीर आहे. यासाठी ओमिक्रॉनचे (Omicron) नवे व्हेरिएंट्स जबाबदार आहेत की नाही, याबद्दल डॉक्टरांनाही ठोस माहिती नाही. मात्र ही अचानक वाढ जरी झाली असली तरी मृत्यूचं प्रमाण तुलनेनं कमी आहे. मंगळवारी म्हणजे १६ ऑगस्ट रोजी मुंबईतल्या विविध रुग्णालयांमध्ये ४०० पेक्षा जास्त रुग्ण दाखल करण्यात आले आहे. तर १ ऑगस्ट रोजी २०७ रुग्ण दाखल झाले होते.

अंधेरीतल्या सेव्हन हिल्स या विशेष कोविड रुग्णालयामध्ये ही वाढ ठळकपणे दिसून आली आहे. अचानक २१२ रुग्ण वाढले आहे. ऑगस्टच्या पहिल्या आठवड्यात रुग्णालयात साधारण १०० रुग्ण दाखल होते. ऑगस्टच्या पहिल्या पंधरवड्यात मुंबईतल्या कोरोना (Covid 19) रुग्णांची संख्या ८,३५९ होती. जुलैच्या शेवटच्या दोन आठवड्यांत ही संख्या ४,४८३ इतकी होती.